കൊച്ചി: അനധികൃത സ്വത്ത് സമ്പാദിച്ചെന്ന് വിജിലൻസ് കണ്ടെത്തിയ ജിഎസ്ടി ജോയിന്റ് കമ്മിഷണർ പ്രജനി രാജനെ സർവീസിൽനിന്നു സസ്പെൻഡ് ചെയ്തു. കൊച്ചി ജി എസ് ടി ഓഫീസിൽ ജോയിന്റ് കമ്മീഷണറായ പ്രജനി രാജന്റെ വീട്ടിൽ വിജിലൻസ് നടത്തിയ റെയ്ഡിൽ കണക്കിൽപ്പെടാത്ത ലക്ഷക്കണക്കിന് രൂപയും ഡോളറും സ്വർണഭരണങ്ങളും പിടിച്ചെടുത്തിരുന്നു. റെയ്ഡ് കഴിഞ്ഞ് അഞ്ചു ദിവസത്തിനുശേഷമാണ് ഇവരെ സസ്പെൻഡ് ചെയ്തത്.
വിജിലൻസ് കേസെടുത്തിട്ടും സസ്പെൻഡ് ചെയ്യാത്തതിൽ വ്യാപക വിമർശനം ഉയർന്നിരുന്നു. വിജിലൻസ് റെയ്ഡും തുടർനടപടി ശുപാർശ ചെയ്തിട്ടും നടപടി ഒന്നുമുണ്ടായില്ല. മാത്രമല്ല, റെയ്ഡിനുശേഷം മൂന്ന് ദിവസം പ്രജനി രാജൻ ഓഫീസിൽ വരികയും ചെയ്തു.
പ്രജനി രാജൻ സർവീസിൽ തുടരുന്നത് തെളിവ് നശിപ്പിക്കാനും അന്വേഷണം തടസപ്പെടുത്താനും സാക്ഷികളെ സ്വാധീനിക്കാനും കാരണമാകുമെന്നും ചൂണ്ടിക്കാണിക്കപ്പെട്ടിരുന്നു. ഇതിനുപിന്നാലെയാണ് നടപടി.
ഇക്കഴിഞ്ഞ ശനിയാഴ്ചയാണ് പ്രജനിയുടെ തേവരയിലെ ഓഫിസിലും പച്ചാളത്തെ വസതിയിലും വിജിലൻസ് റെയ്ഡ് നടത്തിയത്. ഇതിൽ കണക്കിൽപ്പെടാത്ത 14.10 ലക്ഷം രൂപ, 788 യുഎസ് ഡോളർ, ഒരു പവൻ വീതം തൂക്കമുള്ള നാല് സ്വർണനാണയങ്ങൾ, 190 ഗ്രാം സ്വർണാഭരണങ്ങൾ എന്നിവ വിജിലൻസ് പിടിച്ചെടുത്തിരുന്നു.