കുവൈറ്റ് സിറ്റി: കുവൈറ്റിലെ പ്രശസ്തമായ അൽ ഷാഹിദ് പാർക്കിന്റെ മൂന്നാം ഘട്ട വികസന പദ്ധതിയുടെ ഭാഗമായി നിർമ്മിച്ച ‘അൽ സൂർ’ തിയേറ്റർ ഉദ്ഘാടനം ചെയ്തു.
അമീർ ഷെയ്ഖ് മിഷാൽ അൽ-അഹമ്മദ് അൽ-ജാബർ അൽ-സബാഹിന്റെ രക്ഷാകർതൃത്വത്തിൽ നടന്ന ഉദ്ഘാടന ചടങ്ങിൽ അമീറിന്റെ പ്രതിനിധിയായി കുവൈറ്റ് പ്രധാനമന്ത്രി ഷെയ്ഖ് അഹമ്മദ് അൽ-അബ്ദുള്ള അൽ-അഹമ്മദ് അൽ-സബാഹ് പങ്കെടുത്തു.
കുവൈറ്റിന്റെ കലാ-സാംസ്കാരിക രംഗത്തിന് പുതിയ വേദി ഒരുക്കുന്നതാണ് അൽ സൂർ തിയേറ്റർ. ആധുനിക സാങ്കേതിക സംവിധാനങ്ങളോടെയാണ് തിയേറ്റർ സമുച്ചയം സജ്ജീകരിച്ചിരിക്കുന്നത്.
ദേശീയവും അന്തർദേശീയവുമായ നാടകങ്ങൾ, സാംസ്കാരിക പരിപാടികൾ, കലാപരിപാടികൾ, സമ്മേളനങ്ങൾ തുടങ്ങിയവ സംഘടിപ്പിക്കുന്നതിനുള്ള സൗകര്യങ്ങൾ പുതിയ വേദിയിൽ ഒരുക്കിയിട്ടുണ്ട്.
അൽ ഷാഹിദ് പാർക്കിന്റെ വികസന പദ്ധതിയുടെ ഭാഗമായി സാംസ്കാരികവും വിനോദപരവുമായ സൗകര്യങ്ങൾ വിപുലീകരിക്കുന്നതിന്റെ ഭാഗമായാണ് പുതിയ തിയേറ്റർ ഒരുക്കിയത്. രാജ്യത്തെ കലാകാരന്മാർക്കും സാംസ്കാരിക പ്രവർത്തകർക്കും അന്തർദേശീയ തലത്തിലുള്ള പരിപാടികൾക്കും പുതിയ വേദി ലഭ്യമാക്കുന്നതിലൂടെ കുവൈറ്റിന്റെ സാംസ്കാരിക രംഗത്തിന് കൂടുതൽ ഉണർവ് നൽകുകയാണ് പദ്ധതിയുടെ ലക്ഷ്യം.