ദോഹ: മുതിർന്ന പൗരന്മാർക്ക് വിമാനയാത്ര കൂടുതൽ സുഗമവും സൗകര്യപ്രദവുമാക്കുന്നതിനായി ഹമദ് അന്താരാഷ്ട്ര വിമാനത്താവളവും ഖത്തർ ഫൗണ്ടേഷന്റെ കീഴിലുള്ള മുതിർന്നവർക്കായുള്ള Ehsan കേന്ദ്രവും സംയുക്ത പദ്ധതി ആരംഭിച്ചു.
അന്താരാഷ്ട്ര വയോജന ദിനത്തോടനുബന്ധിച്ചാണ് പദ്ധതി ആരംഭിച്ചത്. വിമാനത്താവളത്തിലെ യാത്രാ നടപടികൾ, ലഭ്യമായ സഹായ സംവിധാനങ്ങൾ, ഡിജിറ്റൽ സേവനങ്ങൾ, പ്രത്യേക സൗകര്യങ്ങൾ എന്നിവ മുതിർന്ന യാത്രക്കാർക്ക് പരിചയപ്പെടുത്തുകയാണ് ലക്ഷ്യം.
പദ്ധതിയുടെ ഭാഗമായി മുതിർന്ന പൗരന്മാർക്കായി ഹമദ് വിമാനത്താവളത്തിലേക്ക് കാലാകാലങ്ങളിൽ പ്രത്യേക സന്ദർശനങ്ങൾ സംഘടിപ്പിക്കും. വിമാനത്താവളത്തിലെ സൗകര്യങ്ങൾ പരിചയപ്പെടുത്തുന്നതിനൊപ്പം യാത്രയുടെ വിവിധ ഘട്ടങ്ങളെക്കുറിച്ചും ബോധവൽക്കരണ സെഷനുകൾ നടത്തും.
മുതിർന്ന യാത്രക്കാരുടെ അഭിപ്രായങ്ങളും നിർദേശങ്ങളും ശേഖരിച്ച് ഭാവിയിലെ സേവനങ്ങളും ബോധവൽക്കരണ പരിപാടികളും കൂടുതൽ മെച്ചപ്പെടുത്താനും പദ്ധതിയുണ്ട്.