കുവൈത്ത് സിറ്റി: കുവൈത്തിലെ ചെസ്റ്റ് ഡിസീസസ് ആശുപത്രിയിൽ കത്തീറ്ററൈസേഷൻ സാങ്കേതികവിദ്യ ഉപയോഗിച്ച് ട്രൈകസ്പിഡ് വാൽവ് വിജയകരമായി സ്ഥാപിച്ചു. തുറന്ന ഹൃദയ ശസ്ത്രക്രിയ നടത്താതെ കത്തീറ്റർ വഴി വാൽവ് സ്ഥാപിച്ച നടപടിയാണ് വിജയകരമായി പൂർത്തിയാക്കിയത്.
ഹൃദയത്തിലെ ട്രൈകസ്പിഡ് വാൽവിന്റെ തകരാറുമായി ബന്ധപ്പെട്ട രോഗാവസ്ഥയ്ക്കാണ് നൂതന ചികിത്സാരീതി പ്രയോഗിച്ചത്. സാധാരണയായി കൂടുതൽ സങ്കീർണമായ ശസ്ത്രക്രിയ ആവശ്യമായി വരാവുന്ന സാഹചര്യത്തിൽ, കത്തീറ്റർ അടിസ്ഥാനമാക്കിയുള്ള സാങ്കേതികവിദ്യ ഉപയോഗിച്ച് ചികിത്സ പൂർത്തിയാക്കാൻ കഴിഞ്ഞത് ശ്രദ്ധേയമായ നേട്ടമായാണ് വിലയിരുത്തപ്പെടുന്നത്.
പ്രത്യേക കത്തീറ്റർ സംവിധാനത്തിലൂടെ ആവശ്യമായ ഭാഗത്ത് എത്തിച്ചാണ് വാൽവ് സ്ഥാപിക്കുന്ന നടപടിക്രമം പൂർത്തിയാക്കിയത്. രോഗിയുടെ ആരോഗ്യനിലയും ചികിത്സാ ഫലവും മെഡിക്കൽ സംഘം നിരീക്ഷിച്ചുവരുന്നു.
കുവൈത്തിലെ ഹൃദയചികിത്സാ രംഗത്ത് ആധുനിക കത്തീറ്റർ അധിഷ്ഠിത ചികിത്സാ സംവിധാനങ്ങളുടെ സാധ്യതകൾ കൂടുതൽ വിപുലപ്പെടുത്തുന്ന നേട്ടമാണിതെന്ന് ആരോഗ്യരംഗത്തെ വിദഗ്ധർ ചൂണ്ടിക്കാട്ടുന്നു.