കുവൈത്ത് സിറ്റി: രാജ്യത്തെ മാധ്യമമേഖലയെ കൂടുതൽ കാര്യക്ഷമവും ആധുനികവുമാക്കുന്നതിനായി പുതിയ മീഡിയ റെഗുലേഷൻ നിയമത്തിന് കുവൈത്ത് സർക്കാർ നടപടികൾ ശക്തമാക്കി. പ്രിന്റ്, ഓഡിയോ-വിഷ്വൽ, ഇലക്ട്രോണിക് മാധ്യമ മേഖലകളെ ഏകീകൃത നിയമചട്ടക്കൂടിന് കീഴിൽ കൊണ്ടുവരികയാണ് ലക്ഷ്യം.
മാധ്യമ സ്ഥാപനങ്ങളുടെ ലൈസൻസിങ്, പ്രസിദ്ധീകരണം, ബ്രോഡ്കാസ്റ്റിങ്, ഡിജിറ്റൽ കണ്ടന്റ്, പരസ്യം തുടങ്ങിയ മേഖലകൾക്ക് വ്യക്തമായ നിയമവ്യവസ്ഥകൾ കൊണ്ടുവരുന്നതാണ് പുതിയ നിയമത്തിന്റെ പ്രധാന ലക്ഷ്യം.
സോഷ്യൽ മീഡിയ, ഡിജിറ്റൽ പ്ലാറ്റ്ഫോമുകൾ, കണ്ടന്റ് ക്രിയേറ്റർമാർ തുടങ്ങിയ പുതിയ മാധ്യമ സംവിധാനങ്ങളും നിയമത്തിന്റെ പരിധിയിൽ ഉൾപ്പെടുത്തുന്നതിനുള്ള വ്യവസ്ഥകൾ പരിഗണിച്ചിട്ടുണ്ട്. മാധ്യമരംഗത്തെ സാങ്കേതിക മാറ്റങ്ങൾക്കനുസരിച്ച് നിയമസംവിധാനം പരിഷ്കരിക്കുകയാണ് ഇതിലൂടെ ലക്ഷ്യമിടുന്നത്.
പുതിയ നിയമത്തിന്റെ കരട് മന്ത്രിസഭ അംഗീകരിച്ച് അന്തിമ അംഗീകാരത്തിനായി സമർപ്പിച്ച ഘട്ടത്തിലാണ് നിലവിലെ നടപടികളെന്നാണ് റിപ്പോർട്ടുകൾ.