തിരുവനന്തപുരം: ചിന്നക്കനാലിലെ മനുഷ്യ–ആന സംഘർഷവുമായി ബന്ധപ്പെട്ട് വനംമന്ത്രി ഷിബു ബേബി ജോണും മുൻ ഐ.എഫ്.എസ് ഉദ്യോഗസ്ഥ പ്രകൃതി ശ്രീവാസ്തവയും തമ്മിൽ വേദിയിൽ വാക്‌പോര്. ചിന്നക്കനാലിൽ ജനവാസമേഖല രൂപപ്പെട്ടതിന് പിന്നിലെ തീരുമാനങ്ങളെക്കുറിച്ചുള്ള മന്ത്രിയുടെ പരാമർശങ്ങളാണ് തർക്കത്തിന് കാരണമായത്.
ചൊവ്വാഴ്ച തിരുവനന്തപുരത്ത് കോഎക്സിസ്റ്റൻസ് കളക്ടീവ് സംഘടിപ്പിച്ച വന്യജീവി വാരാചരണ പരിപാടിയിലായിരുന്നു സംഭവം. ചിന്നക്കനാലിലെ മനുഷ്യ–ആന സംഘർഷം മനുഷ്യനിർമിത പ്രശ്നമാണെന്നും 301 കോളനിയിൽ ആളുകളെ പുനരധിവസിപ്പിക്കുന്നതിനുള്ള ആശയത്തിന് മുൻ വനംവകുപ്പ് ഉദ്യോഗസ്ഥയായ പ്രകൃതി ശ്രീവാസ്തവയുടെ ശുപാർശയാണ് അടിസ്ഥാനമായതെന്നും മന്ത്രി നേരത്തെ പറഞ്ഞിരുന്നു.
2002-ൽ മുണ്ടാർ ഡിവിഷണൽ ഫോറസ്റ്റ് ഓഫീസറായിരിക്കെ പ്രകൃതി ശ്രീവാസ്തവ ഹൈറേഞ്ച് സർക്കിൾ കൺസർവേറ്റർ ഓഫ് ഫോറസ്റ്റിന് നൽകിയ കത്തും മന്ത്രി പരാമർശിച്ചു. എന്നാൽ, ഇതിനെതിരെ വേദിയിൽ തന്നെ പ്രകൃതി ശ്രീവാസ്തവ രംഗത്തെത്തി.
കത്ത് അതിന്റെ പൂർണമായ സാഹചര്യത്തിൽ പരിശോധിക്കാതെയാണ് ഉദ്ധരിക്കുന്നതെന്ന് അവർ പറഞ്ഞു. അന്നത്തെ സംഭവവികാസങ്ങളുടെ മുഴുവൻ പശ്ചാത്തലവും പരിശോധിച്ച ശേഷമേ വിഷയത്തിൽ അഭിപ്രായം പറയാവൂ എന്നും അവർ മന്ത്രിയോട് ആവശ്യപ്പെട്ടു.
താൻ ലഭ്യമായ ഔദ്യോഗിക രേഖകളുടെ അടിസ്ഥാനത്തിലാണ് സംസാരിക്കുന്നതെന്ന് മന്ത്രി മറുപടി നൽകി. എന്നാൽ, വിഷയവുമായി ബന്ധപ്പെട്ട രേഖകൾ വനംമന്ത്രിയുടെ ഓഫീസിലും സെക്രട്ടേറിയറ്റിലും ലഭ്യമാണെന്നും മുഴുവൻ കാര്യങ്ങളും വിശദമായി പരിശോധിക്കണമെന്നും ശ്രീവാസ്തവ വ്യക്തമാക്കി.
മാത്തിക്കെട്ടാൻ കൈയേറ്റവും പുനരധിവാസവും
മാത്തിക്കെട്ടാൻ ചോലയിൽ നടന്ന കൈയേറ്റങ്ങൾ ഒഴിപ്പിക്കുന്ന നടപടികൾ ശക്തമായിരുന്ന കാലഘട്ടത്തിലാണ് താൻ പ്രസ്തുത കത്ത് നൽകിയതെന്ന് ശ്രീവാസ്തവ വിശദീകരിച്ചു. ഒഴിപ്പിക്കപ്പെടുന്ന കുടുംബങ്ങളുടെ പുനരധിവാസം സംബന്ധിച്ച പ്രശ്നം പരിഹരിക്കേണ്ട സാഹചര്യമുണ്ടായിരുന്നുവെന്നും അവർ പറഞ്ഞു.
മാത്തിക്കെട്ടാൻ വനമേഖല സംരക്ഷിക്കുന്നതിനായിരുന്നു അന്നത്തെ പ്രധാന പരിഗണനയെന്നും ചിന്നക്കനാലുമായി ബന്ധപ്പെട്ട കത്ത് ഒരു ആഭ്യന്തര ആശയവിനിമയം മാത്രമായിരുന്നുവെന്നും അവർ വ്യക്തമാക്കി. അത് സർക്കാരിന്റെ ഔദ്യോഗിക തീരുമാനമായി മാറിയിട്ടില്ലെന്നും അവർ ചൂണ്ടിക്കാട്ടി.
2003ലെ മന്ത്രിസഭാ തീരുമാനം
ചിന്നക്കനാലിൽ ആളുകളെ പുനരധിവസിപ്പിക്കാനുള്ള യഥാർത്ഥ തീരുമാനം പിന്നീട് 2003ൽ മന്ത്രിസഭയാണ് എടുത്തതെന്ന് ശ്രീവാസ്തവ പറഞ്ഞു. 257 ഹെക്ടർ പ്രദേശത്ത് 559 കുടുംബങ്ങളെ പുനരധിവസിപ്പിക്കാനായിരുന്നു തീരുമാനം.
ഈ നീക്കത്തെ താൻ എതിർത്തിരുന്നുവെന്നും ചിന്നക്കനാൽ ആനകളുടെ സഞ്ചാരപാതയാണെന്നും അവിടെ ജനവാസം സ്ഥാപിച്ചാൽ ഭാവിയിൽ മനുഷ്യ–ആന സംഘർഷം രൂക്ഷമാകുമെന്നും സർക്കാരിന് മുന്നറിയിപ്പ് നൽകിയിരുന്നുവെന്നും അവർ പറഞ്ഞു.
പുനരധിവാസം നടന്ന് ഒരു വർഷത്തിനുള്ളിൽ തന്നെ ആനകൾ ജനവാസമേഖലയിലൂടെ സഞ്ചരിക്കാൻ തുടങ്ങിയതോടെ സംഘർഷം രൂക്ഷമായെന്നും ശ്രീവാസ്തവ വ്യക്തമാക്കി. സാമ്പത്തിക ശേഷിയുള്ള ചില കുടുംബങ്ങൾ പിന്നീട് പ്രദേശം വിട്ടുപോയെങ്കിലും സാമ്പത്തികമായി പിന്നാക്കം നിൽക്കുന്ന കുടുംബങ്ങൾ അവിടെ തുടരുകയായിരുന്നുവെന്നും അവർ പറഞ്ഞു.
തുടർന്ന് പ്രദേശം സംരക്ഷിക്കുന്നതിനും അവിടെയുള്ള താമസക്കാരെ മാറ്റിപ്പാർപ്പിക്കുന്നതിനുമായി വനംവകുപ്പ് പദ്ധതി തയ്യാറാക്കിയെങ്കിലും അത് മുന്നോട്ട് പോയില്ലെന്നും അവർ വ്യക്തമാക്കി.
ചിന്നക്കനാലിലെ നിലവിലെ മനുഷ്യ–വന്യജീവി സംഘർഷത്തിന്റെ പശ്ചാത്തലത്തിൽ, മുൻകാല ഭരണതീരുമാനങ്ങളും വന്യജീവികളുടെ സഞ്ചാരപാതകളുടെ സംരക്ഷണവും സംബന്ധിച്ച ചർച്ചകൾ വീണ്ടും സജീവമായിരിക്കുകയാണ്.