ഡോക്ടർ ബി. ഇഖ്ബാൽ എഴുതുന്നു
സംസ്ഥാന ആരോഗ്യവകുപ്പ് സ്വകാര്യ ആശുപത്രികളെ നിയന്ത്രിക്കുന്ന നിയമം ശക്തിപ്പെടുത്തുകയും ചികിത്സയ്ക്ക് ഈടാക്കാവുന്ന നിരക്കുകൾക്ക് പരിധി നിശ്ചയിക്കുകയും ചെയ്യുമെന്ന വാർത്ത തികച്ചും സ്വാഗതാർഹമാണ്. രോഗാതുരത വർധിക്കുന്നതും ചികിത്സാചെലവ് കുതിച്ചുയരുന്നതുമാണ് കേരളം നേരിടുന്ന പ്രധാന ആരോഗ്യ വെല്ലുവിളിൾ. രോഗഭാരം കൂടുമ്പോൾ ചികിത്സ തേടുന്നവരുടെ എണ്ണം വർധിക്കുകയും, അതോടൊപ്പം ചികിത്സയുടെ സാമ്പത്തികഭാരം കുടുംബങ്ങളെ കൂടുതൽ പ്രതിസന്ധിയിലാക്കുകയും ചെയ്യുന്നു.
കേരളത്തിന്റെ ആരോഗ്യനയം ഒരേസമയം രോഗാതുരത കുറയ്ക്കുകയും ചികിത്സാചെലവ് നിയന്ത്രിക്കുകയും ചെയ്യുന്ന രണ്ടു സമീപനങ്ങളുടെ അടിസ്ഥാനത്തിലാണ് മുന്നോട്ട് പോകേണ്ടത്.
രോഗം തടയുക; ചികിത്സയുടെ സാമ്പത്തികഭാരം കുറയ്ക്കുക
രോഗപ്രതിരോധം, ആരോഗ്യവിദ്യാഭ്യാസം, നേരത്തെയുള്ള രോഗനിർണയം, ജീവിതശൈലി മാറ്റങ്ങൾ എന്നിവയ്ക്ക് കൂടുതൽ ഊന്നൽ നൽകികൊണ്ട് സർക്കാർ ഇതിനകം പ്രഖ്യാപിച്ചിട്ടുള്ള പദ്ധതികൾ കൂടുതൽ വിപുലീകരിക്കുകയും കാര്യക്ഷമമായി നടപ്പാക്കുകയും വേണം.
അതോടൊപ്പം, വർഷങ്ങളായി ജനകീയാരോഗ്യ പ്രവർത്തകർ ഉന്നയിച്ചുവരുന്ന സ്വകാര്യ ആശുപത്രികളിലെ ചികിത്സാചെലവ് നിയന്ത്രിക്കാനുള്ള നടപടികൾ അടിയന്തരമായി സ്വീകരിക്കേണ്ടതുണ്ട്. ആരോഗ്യസംരക്ഷണം ഒരു അവകാശമായിരിക്കുമ്പോൾ, ഗുരുതരമായ രോഗം ഒരു കുടുംബത്തെ സാമ്പത്തികമായി തകർക്കുന്ന അവസ്ഥ അംഗീകരിക്കാനാവില്ല.
ഫീസ് പ്രദർശിപ്പിക്കുന്നത് മാത്രം പോരാ; നിരക്ക് നിശ്ചയിക്കണം
അതോടൊപ്പം വർഷങ്ങളായി ജനകീയാരോഗ്യപ്രവർത്തകർ ആവശ്യപ്പെടുന്ന സ്വകാര്യ ആശുപത്രികളിലെ ചികിത്സാ ചെലവ് നിയന്ത്രിക്കാനുള്ള നടപടികളും സ്വീകരിക്കേണ്ടതാണ്. അതോടൊപ്പം ക്ലിനിക്കൽ എസ്റ്റാബ്ളിഷ് മെൻ്റ് ആക്ടിലും ഉചിതമായ മാറ്റം വരുത്താൻ സർക്കാർ ആലോചിക്കുന്നു എന്നറിഞ്ഞതിലും സന്തോഷമുണ്ട്. ഇപ്പോഴത്തെ നിയമപ്രകാരം ആശുപത്രികൾ അവരുടെ ചികിത്സാ ഫീസ് മാത്രം പ്രദർശിപ്പിച്ചാൽ മതിയാവും. അതിൽ കൂടുതൽ ഈടാക്കരുതെന്ന് മാത്രമാണ് നിലവിലെ നിയമത്തിൽ പറയുന്നത്. എന്നാൽ ഇത് മാത്രം പോരാ രോഗാവസ്ഥക്കും ശസ്ത്രക്രിയക്കും മറ്റുമുള്ള ഫീസ് നിശ്ചയിച്ച് നിയമത്തിൽ ഉൾപ്പെടുത്തണമെന്ന നിർദ്ദേശം ജനകീയാരോഗ്യപ്രവർത്തകർ മുന്നോട്ട് വച്ചിരുന്നു അതാണിപ്പോൾ നടപ്പിലാക്കാൻ പോകുന്നതെന്ന് പ്രതീക്ഷിക്കുന്നു.
സംസ്ഥാന ആരോഗ്യ ഇൻഷുറൻസ് പദ്ധതികളിൽ വിവിധ ചികിത്സകൾക്ക് നിരക്കുകൾ നിശ്ചയിച്ചിട്ടുള്ളതുപോലെ, Central Government Health Scheme (CGHS) ഉൾപ്പെടെയുള്ള കേന്ദ്ര സർക്കാർ പദ്ധതികളിലും ചികിത്സാ നിരക്കുകൾ നിശ്ചയിച്ചിട്ടുണ്ട്. നിലവിലുള്ള ഇത്തരം നിരക്കുകളും ചികിത്സാ ചെലവുമായി ബന്ധപ്പെട്ട വിവരങ്ങളും ശാസ്ത്രീയമായി വിലയിരുത്തി കേരളത്തിന് അനുയോജ്യമായ യുക്തിസഹവും സുതാര്യവുമായ ചികിത്സാ നിരക്ക് പട്ടിക തയ്യാറാക്കാവുന്നതാണ്.
ആശുപത്രി ബിൽ മാത്രമല്ല; പരിശോധനാ ചെലവും നിയന്ത്രിക്കണം
എന്നാൽ ചികിത്സാ നിരക്കുകൾക്ക് പരിധി നിശ്ചയിച്ചതുകൊണ്ട് മാത്രം ആരോഗ്യച്ചെലവ് നിയന്ത്രിക്കാനാവില്ല. രോഗനിർണയ പരിശോധനകളുടെ നിരക്കുകളും യുക്തിസഹമായി നിശ്ചയിക്കേണ്ടതുണ്ട്. പരിശോധനകൾ, ഉപഭോഗവസ്തുക്കൾ, പ്രൊസീജർ ചാർജുകൾ, മറ്റ് അനുബന്ധ ചെലവുകൾ (Co-payment) തുടങ്ങിയവയുടെ പേരിൽ രോഗികളിൽ നിന്ന് അധിക തുക ഈടാക്കുന്ന രീതികളും പരിശോധിക്കണം. അതുകൊണ്ട് ചികിത്സയുടെ ഓരോ ഘട്ടത്തിലും എന്തിനാണ് ഏത് പരിശോധന നടത്തുന്നത്, എപ്പോൾ നടത്തണം, ഏത് ചികിത്സയാണ് ആവശ്യമായത്, അതിന് എത്രമാത്രം ചെലവ് വരണം എന്നതിൽ വ്യക്തമായ മാനദണ്ഡങ്ങൾ ആവശ്യമാണ്.
ചികിത്സാ രോഗനിർണ്ണയ മാനദണ്ഡങ്ങൾ കർശനമായി നടപ്പാക്കണം
ഇതിനായി ശാസ്ത്രീയ തെളിവുകളുടെ അടിസ്ഥാനത്തിൽ രൂപപ്പെടുത്തിയിട്ടുള്ള Standard Treatment Guidelines (STGs) ഫലപ്രദമായി നടപ്പാക്കണം. രോഗനിർണയത്തിലും ചികിത്സയിലും അനാവശ്യമായ പരിശോധനകളും ചികിത്സകളും ഒഴിവാക്കാൻ ഇത്തരം മാർഗനിർദേശങ്ങൾക്ക് കഴിയും. രോഗിയുടെ സുരക്ഷയും ചികിത്സയുടെ ഗുണനിലവാരവും ഉറപ്പാക്കുന്നതിനൊപ്പം, അനാവശ്യ പരിശോധനകളും അനാവശ്യ ചികിത്സകളും ഒഴിവാക്കുന്നതിലൂടെ രോഗിയുടെ സാമ്പത്തികഭാരവും കുറയ്ക്കാൻ ഇതുവഴി സാധിക്കും.
നിരക്ക് നിശ്ചയിച്ചാൽ മാത്രം പോരാ; നടപ്പാക്കുന്നുണ്ടെന്ന് ഉറപ്പാക്കണം
എന്നാൽ ഏറ്റവും പ്രധാനപ്പെട്ട ചോദ്യം നിയമവും നിരക്കുപട്ടികയും മാർഗനിർദേശങ്ങളും നിലവിൽ വന്നശേഷം അവ യഥാർത്ഥത്തിൽ സ്വകാര്യ ആശുപത്രികൾ പാലിക്കുന്നുണ്ടോ എന്നതാണ്. അതിനാൽ ചികിത്സാ നിരക്കുകൾ, പരിശോധനാ നിരക്കുകൾ, ചികിത്സാ രോഗനിർണ്ണയ മാനദണ്ഡങ്ങൾ എന്നിവ സ്വകാര്യ ആശുപത്രികൾ പാലിക്കുന്നുണ്ടെന്ന് ഉറപ്പാക്കുന്നതിനായി സ്വതന്ത്രവും കാര്യക്ഷമവുമായ ഒരു നിരീക്ഷണ-വിലയിരുത്തൽ (Monitoring and Evaluation) സംവിധാനം രൂപീകരിക്കണം. പരാതികൾ സ്വീകരിക്കാനും പരിശോധിക്കാനും, ആശുപത്രികളുടെ ബില്ലുകൾ പരിശോധിക്കാനും, നിയമലംഘനങ്ങളിൽ നടപടി സ്വീകരിക്കാനും കഴിയുന്ന അധികാരവും സംവിധാനത്തിനുണ്ടാകണം.
ആരോഗ്യസംരക്ഷണം വിപണിക്ക് വിട്ടുകൊടുക്കാനാവില്ല
സ്വകാര്യ ആശുപത്രികൾ ആരോഗ്യസംവിധാനത്തിന്റെ അനിവാര്യ ഘടകമാണെങ്കിലും, ആരോഗ്യപരിചരണം പൂർണമായും വിപണിയുടെ യുക്തിക്ക് വിട്ടുകൊടുക്കാനാവില്ല. രോഗിയുടെ ദുരിതവും അടിയന്തരാവസ്ഥയും അമിതനിരക്ക് ഈടാക്കാനുള്ള അവസരമായി മാറുന്ന സാഹചര്യം ഒഴിവാക്കേണ്ടത് സർക്കാരിന്റെ ഉത്തരവാദിത്തമാണ്.
അതിനാൽ രോഗപ്രതിരോധം മുതൽ ചികിത്സ, രോഗനിർണയം, മരുന്ന്, ചികിത്സാനന്തര പരിചരണം വരെ ആരോഗ്യസംരക്ഷണത്തിന്റെ ഓരോ ഘട്ടത്തിലും ശാസ്ത്രീയമായ മാനദണ്ഡങ്ങളും സുതാര്യമായ നിരക്കുകളും ഫലപ്രദമായ നിയന്ത്രണ സംവിധാനവും ഉറപ്പാക്കണം.
നിയമം കൊണ്ടുവരുന്നതാണ് ആദ്യപടി. നിരക്ക് നിശ്ചയിക്കുന്നതാണ് രണ്ടാമത്തെ തലം. അത് പാലിക്കുന്നുണ്ടെന്ന് ഉറപ്പാക്കുന്ന ശക്തമായ നിരീക്ഷണ സംവിധാനമാണ് മൂന്നാമത്തെയും ഏറ്റവും നിർണായകവുമായ ഘട്ടം. ഈ മൂന്ന് ഘടകങ്ങളും ഒരുമിച്ച് പ്രവർത്തിക്കുമ്പോഴാണ്. ജനങ്ങൾക്ക് യഥാർഥ ആശ്വാസം ലഭിക്കുക. അതിലേക്കുള്ള പ്രാരംഭനടപടികൾ ആരോഗ്യവകുപ്പ് സ്വീകരിച്ച് തുടങ്ങിയതിൽ വളരെ സന്തോഷമുണ്ട്.