കുവൈത്ത് സിറ്റി: വൈദ്യുതി, ജല വിതരണ മേഖലകളിൽ ഗൾഫ് സഹകരണ കൗൺസിൽ (GCC) രാജ്യങ്ങൾ തമ്മിലുള്ള ഏകോപനവും പരസ്പര സഹകരണവും കൂടുതൽ ശക്തമാക്കേണ്ടതുണ്ടെന്ന് കുവൈത്ത് വൈദ്യുതി മന്ത്രി വ്യക്തമാക്കി.
ഭാവിയിൽ വൈദ്യുതി-ജല മേഖലകൾ നേരിടാനിടയുള്ള വിവിധ വെല്ലുവിളികളെ കൂട്ടായ്മയിലൂടെ നേരിടേണ്ടത് അനിവാര്യമാണെന്ന് മന്ത്രി ചൂണ്ടിക്കാട്ടി. ഊർജാവശ്യകത വർധിക്കുന്ന സാഹചര്യത്തിൽ വൈദ്യുതി ഉൽപാദനം, ജലസ്രോതസ്സുകളുടെ സുരക്ഷ, വിതരണ ശൃംഖലകളുടെ കാര്യക്ഷമത എന്നിവയിൽ ഗൾഫ് രാജ്യങ്ങൾ തമ്മിലുള്ള സഹകരണം നിർണായകമാണെന്നും അദ്ദേഹം വ്യക്തമാക്കി.
അടിയന്തര സാഹചര്യങ്ങളിൽ പരസ്പരം പിന്തുണ നൽകുന്നതിനും അടിസ്ഥാന സൗകര്യങ്ങളുടെ സുരക്ഷ ഉറപ്പാക്കുന്നതിനും ഏകീകൃത സമീപനം ആവശ്യമാണ്. സാങ്കേതികവിദ്യ, പുതിയ ഊർജസ്രോതസ്സുകൾ, ജലസംരക്ഷണം തുടങ്ങിയ മേഖലകളിലും സംയുക്ത പദ്ധതികൾക്ക് പ്രാധാന്യം നൽകേണ്ടതുണ്ടെന്നും മന്ത്രി വ്യക്തമാക്കി.