കുവൈത്ത് സിറ്റി: കുവൈത്ത്–സൗദി അതിർത്തിയിലെ സലാമി ചെക്ക്‌പോസ്റ്റിൽ വൻ സിഗരറ്റ് കടത്ത് ശ്രമം അധികൃതർ പരാജയപ്പെടുത്തി. 53,314 കാർട്ടൺ സിഗരറ്റുകളാണ് പിടികൂടിയത്.
കാർട്ടൺ ബോക്സുകൾക്കുള്ളിൽ സിഗരറ്റുകൾ ഒളിപ്പിച്ച ശേഷം കസ്റ്റംസ് പ്രഖ്യാപനത്തിൽ ഇവ അലുമിനിയം പാത്രങ്ങൾ എന്ന പേരിലാണ് രേഖപ്പെടുത്തിയിരുന്നത്.
കുവൈത്ത് ക്രിമിനൽ സെക്യൂരിറ്റി വിഭാഗത്തിന് കീഴിലെ ജനറൽ ഡിപ്പാർട്ട്മെന്റ് ഓഫ് ക്രിമിനൽ ഇൻവെസ്റ്റിഗേഷൻ – ലാൻഡ് ബോർഡർ ഇൻവെസ്റ്റിഗേഷൻ വിഭാഗം നടത്തിയ പരിശോധനയിലാണ് കടത്ത് ശ്രമം കണ്ടെത്തിയത്.
സംഭവവുമായി ബന്ധപ്പെട്ട് സിറിയൻ പൗരനായ ട്രക്ക് ഡ്രൈവറെയും യെമൻ പൗരനായ ഒരു ക്ലിയറൻസ് ഓഫീസ് ജീവനക്കാരനെയും പിടികൂടി. ചരക്കുമായി പൊരുത്തപ്പെടാത്ത കസ്റ്റംസ് ഡിക്ലറേഷൻ തയ്യാറാക്കിയതുമായി ബന്ധപ്പെട്ടാണ് ക്ലിയറൻസ് ജീവനക്കാരനെ പിടികൂടിയത്.
തുടർന്നുള്ള അന്വേഷണത്തിൽ അൽ-അബ്ദലി പ്രദേശത്തെ ഒരു കാർഷിക ഹോൾഡിംഗിൽ നിന്നാണ് സിഗരറ്റുകൾ ട്രക്കിൽ കയറ്റിയതെന്ന് കണ്ടെത്തി.
അവിടെ നടത്തിയ പരിശോധനയിൽ ലൈസൻസില്ലാതെ വാണിജ്യ സാധനങ്ങൾ സൂക്ഷിച്ചിരുന്ന മൂന്ന് ഗോഡൗണുകളും കണ്ടെത്തി. സിഗരറ്റുകൾ ട്രക്കിൽ കയറ്റുന്നതുമായി ബന്ധപ്പെട്ട് ഒരു ഇന്ത്യൻ തൊഴിലാളിയെയും പിടികൂടിയതായി റിപ്പോർട്ടുണ്ട്.
കടത്തിന് പിന്നിലെ മുഴുവൻ ശൃംഖലയും കണ്ടെത്തുന്നതിനുള്ള അന്വേഷണം തുടരുകയാണ്.