ജ്യോതിശാസ്ത്രജ്ഞർ. ഭൂമിയിൽനിന്ന് ഏകദേശം 280 പ്രകാശവർഷം അകലെ ഡ്രാക്കോ നക്ഷത്രസമൂഹത്തിൽ സ്ഥിതിചെയ്യുന്ന WD J1330+6435 എന്ന വെളുത്ത കുള്ളൻ നക്ഷത്രമാണ് ഈ കണ്ടെത്തലിലൂടെ ശ്രദ്ധ നേടിയത്.
സാധാരണ നക്ഷത്രങ്ങളുടെ നിറം പ്രധാനമായും അവയുടെ താപനിലയെ ആശ്രയിച്ചാണ് നിർണയിക്കപ്പെടുന്നത്. എന്നാൽ വെളുത്ത കുള്ളൻ നക്ഷത്രങ്ങളുടെ കാര്യത്തിൽ അവയുടെ അന്തരീക്ഷത്തിലെ രാസഘടനയും നിറത്തെ സ്വാധീനിക്കും. ഗ്രഹങ്ങളുടെ തകർന്ന അവശിഷ്ടങ്ങളിൽനിന്ന് ലഭിച്ച സോഡിയം, കാൽസ്യം, ലിഥിയം തുടങ്ങിയ മൂലകങ്ങൾ ഈ നക്ഷത്രത്തിന്റെ പുറംപാളികളിൽ അടിഞ്ഞുകൂടിയതായി ഗവേഷകർ കണ്ടെത്തി.
നക്ഷത്രത്തിന്റെ ഉയർന്ന സാന്ദ്രതയിൽ സോഡിയം ആറ്റങ്ങൾ ഹീലിയം ആറ്റങ്ങളുമായി ഇടപഴകുന്നതുമൂലം പ്രകാശം ആഗിരണം ചെയ്യുന്ന രീതിയിൽ മാറ്റമുണ്ടാകുന്നു. ഇതിന്റെ ഫലമായി മഞ്ഞ, ഓറഞ്ച്, ചുവപ്പ് നിറങ്ങളിലുള്ള പ്രകാശത്തിന്റെ ഒരു ഭാഗം ആഗിരണം ചെയ്യപ്പെടുകയും നക്ഷത്രം പച്ചനിറത്തിൽ ദൃശ്യമാകുകയും ചെയ്യുന്നു.
മധ്യവലിപ്പത്തിലുള്ള നക്ഷത്രങ്ങൾ ഇന്ധനം തീർന്നശേഷം അവയുടെ പുറംപാളികൾ നഷ്ടപ്പെടുകയും ശേഷിക്കുന്ന കാമ്പ് അതീവ സാന്ദ്രമായ വെളുത്ത കുള്ളൻ നക്ഷത്രമായി മാറുകയും ചെയ്യുന്നു. ഭൂമിയുടെ വലിപ്പത്തോട് അടുത്ത വലിപ്പത്തിൽ സൂര്യന്റെ പകുതിയോളം പിണ്ഡം അടങ്ങിയിരിക്കാവുന്ന ഇത്തരം നക്ഷത്രങ്ങൾ പ്രപഞ്ചത്തിലെ ഏറ്റവും സാന്ദ്രമായ നക്ഷത്രാവശിഷ്ടങ്ങളിൽപ്പെടുന്നു.
വാർവിക് സർവകലാശാലയിലെ ഗവേഷകരുടെ നേതൃത്വത്തിൽ നടത്തിയ പഠനത്തിലാണ് പച്ചനിറത്തിലുള്ള നക്ഷത്രത്തിന്റെ പ്രത്യേകത വിശദീകരിച്ചത്. 151 സമീപസ്ഥ വെളുത്ത കുള്ളൻ നക്ഷത്രങ്ങളുടെ നിറവും അന്തരീക്ഷഘടനയും പരിശോധിച്ച പഠനത്തിൽ പിങ്ക് നിറത്തിൽ കാണപ്പെടുന്ന മറ്റൊരു നക്ഷത്രത്തെയും ഗവേഷകർ തിരിച്ചറിഞ്ഞു.
നക്ഷത്രങ്ങളുടെ രാസഘടനയും ഗ്രഹവ്യവസ്ഥകളുടെ അവശിഷ്ടങ്ങളും തമ്മിലുള്ള ബന്ധം മനസ്സിലാക്കുന്നതിന് ഈ കണ്ടെത്തൽ പുതിയ സാധ്യതകൾ തുറക്കുന്നു.