കുവൈത്ത് സിറ്റി: മുതിർന്ന പൗരന്മാർക്കും ഭിന്നശേഷിക്കാർക്കും സർക്കാർ സേവനങ്ങൾ കൂടുതൽ എളുപ്പത്തിൽ ലഭ്യമാക്കുന്നതിനായി കുവൈത്തിലെ ജഹ്‌റ ഗവർണറേറ്റിൽ പ്രത്യേക സേവനകേന്ദ്രം പ്രവർത്തനം ആരംഭിച്ചു. അൽ ഖസ്‌ർ സിറ്റിസൺ സർവീസ് സെന്ററിൽ വാർബ ബാങ്കിന്റെ സഹകരണത്തോടെ സജ്ജീകരിച്ച കേന്ദ്രം ജഹ്‌റ ഗവർണർ ഹമദ് അൽ ഹബ്ഷിയുടെ രക്ഷാകർതൃത്വത്തിലാണ് ഉദ്ഘാടനം ചെയ്തത്.
ഉദ്ഘാടനച്ചടങ്ങിൽ വാർബ ബാങ്ക് റീട്ടെയിൽ ബാങ്കിംഗ് ഗ്രൂപ്പ് മേധാവി അഹമ്മദ് അൽ ഖത്താമിയും വിവിധ മന്ത്രാലയങ്ങളിലെ ഉന്നത ഉദ്യോഗസ്ഥരും പങ്കെടുത്തു.
മുതിർന്ന പൗരന്മാർക്കും ഭിന്നശേഷിക്കാർക്കും സർക്കാർ ഓഫീസുകളിലെ സേവനങ്ങളും ഔദ്യോഗിക ഇടപാടുകളും അനായാസമായും വേഗത്തിലും പൂർത്തിയാക്കാൻ ആവശ്യമായ സൗകര്യങ്ങൾ ഒരുക്കുകയാണ് കേന്ദ്രത്തിന്റെ പ്രധാന ലക്ഷ്യം. സേവനങ്ങൾക്കായി കാത്തിരിക്കേണ്ടിവരുന്ന ബുദ്ധിമുട്ടുകൾ കുറയ്ക്കുന്നതിനും എല്ലാവർക്കും കൂടുതൽ സൗകര്യപ്രദമായ സേവനാന്തരീക്ഷം ഉറപ്പാക്കുന്നതിനും ഈ സംരംഭം സഹായകമാകുമെന്നാണ് പ്രതീക്ഷ.
സർക്കാർ സംവിധാനങ്ങളും സ്വകാര്യ സ്ഥാപനങ്ങളും തമ്മിലുള്ള സഹകരണം ശക്തിപ്പെടുത്തുന്നതിന്റെ ഭാഗമായാണ് വാർബ ബാങ്കിന്റെ പങ്കാളിത്തത്തോടെ കേന്ദ്രം ആരംഭിച്ചിരിക്കുന്നത്. സാമൂഹിക പ്രതിബദ്ധതയുള്ള പ്രവർത്തനങ്ങൾക്ക് മുൻഗണന നൽകുകയും പ്രത്യേക പരിഗണന ആവശ്യമായ വിഭാഗങ്ങൾക്ക് മെച്ചപ്പെട്ട സേവനങ്ങൾ ഉറപ്പാക്കുകയും ചെയ്യുന്നതാണ് പദ്ധതിയുടെ പ്രധാന ലക്ഷ്യം.