ഇന്ത്യൻ വിപണിയിലെ ജനപ്രിയ ബ്രാൻഡുകളിൽ നിത്യേന നാം കഴിക്കുന്ന ഭക്ഷണസാധനങ്ങളിൽ മനുഷ്യജീവന് തന്നെ ആപത്തായ മായങ്ങൾ ചേർത്ത ഞെട്ടിക്കുന്ന വിവരങ്ങൾ പുറത്ത്. പ്രമുഖ ബിസ്കറ്റ് ബ്രാൻഡായ പ്രിയാഗോൾഡ് (സൂര്യ ഫുഡ് & അഗ്രോ ലിമിറ്റഡ്), ദക്ഷിണേന്ത്യയിലെ വൻകിട പാൽ ഉത്പാദകരായ ദോഡ്‌ല ഡയറി, ജൈവ ഉൽപ്പന്ന ബ്രാൻഡായ യുഇഐആർ ഓർഗാനിക് ഫുഡ്സ് എന്നീ കമ്പനികൾക്കെതിരെ ദേശീയ ഭക്ഷ്യസുരക്ഷാ അതോറിറ്റി (FSSAI) കോടതിയിൽ ക്രിമിനൽ പ്രോസിക്യൂഷൻ നടപടികൾ ആരംഭിച്ചു.
ഫുഡ് സേഫ്റ്റി ആൻഡ് സ്റ്റാൻഡേർഡ്സ് ആക്ട് 2006 (FSS Act 2006) പ്രകാരമാണ് കമ്പനികൾക്കെതിരെ കർശന നിയമനടപടികൾ ആരംഭിച്ചിരിക്കുന്നത്.
റെയ്ഡുകളിൽ കണ്ടെത്തിയ ഞെട്ടിക്കുന്ന ക്രമക്കേടുകൾ:
🔹 പ്രിയാഗോൾഡ് ബിസ്കറ്റിൽ കാലിത്തീറ്റ തവിട്:
ബിസ്കറ്റുകളിൽ ഉയർന്ന അളവിൽ ഫൈബർ അടങ്ങിയിട്ടുണ്ടെന്ന് വരുത്തിത്തീർക്കാൻ കന്നുകാലികൾക്ക് തീറ്റയായി നൽകുന്ന തവിടാണ് പ്രിയാഗോൾഡ് ഫാക്ടറിയിൽ പ്രധാന അസംസ്കൃത വസ്തുവായി ഉപയോഗിച്ചത്. പിടിച്ചെടുത്ത ചാക്കുകളിൽ 'മനുഷ്യ ഉപഭോഗത്തിന് ഉദ്ദേശിച്ചുള്ളതല്ല, കന്നുകാലികൾക്കുള്ള തീറ്റ' (Not for human consumption - Cattle feed only) എന്ന് വ്യക്തമായി രേഖപ്പെടുത്തിയിരുന്നു. കൂടാതെ, യാതൊരു ശുചിത്വ മാനദണ്ഡങ്ങളുമില്ലാതെയാണ് ഫാക്ടറി പ്രവർത്തിച്ചിരുന്നതെന്നും കണ്ടെത്തി. ലൈസൻസ് റദ്ദാക്കിയതിനൊപ്പമാണ് കമ്പനിക്കെതിരെ ഇപ്പോൾ ക്രിമിനൽ കേസ് ഫയൽ ചെയ്യുന്നത്.
🔹 ദോഡ്‌ല ഡയറി പാലിൽ ഡിറ്റർജന്റും കോസ്റ്റിക് സോഡയും:
ദോഡ്‌ല ഡയറിയുടെ 'ഫുൾ ക്രീം മിൽക്ക്' സാമ്പിളുകൾ പരിശോധിച്ചപ്പോൾ നിശ്ചിത കൊഴുപ്പ് ഇല്ലാത്ത നിലവാരമില്ലാത്ത പാലാണെന്ന് കണ്ടെത്തിയിരുന്നു. തുടർന്ന് നടത്തിയ വിശദമായ സെൻട്രൽ റഫറൽ ലാബ് പരിശോധനയിലാണ് മനുഷ്യ ശരീരത്തിന് അത്യന്തം അപകടകരമായ ഡിറ്റർജന്റ്, കോസ്റ്റിക് സോഡ എന്നിവയുടെ സാന്നിധ്യം പാലിൽ സ്ഥിരീകരിച്ചത്. സുരക്ഷിതമല്ലാത്ത പാൽ വിറ്റതിന് കമ്പനിക്കും വിതരണക്കാർക്കുമെതിരെ പ്രോസിക്യൂഷൻ അനുമതി നൽകി.
🔹 ഓർഗാനിക് ഉണക്കമുന്തിരിയിൽ മാരക കീടനാശിനി:
പ്രകൃതിദത്തമെന്നും രാസവസ്തുക്കൾ ഇല്ലെന്നും വിശ്വസിപ്പിച്ച് ഉയർന്ന വിലയ്ക്ക് വിറ്റഴിച്ച യുഇഐആർ ഓർഗാനിക് ഫുഡ്സിന്റെ മഞ്ഞ ഉണക്കമുന്തിരിയിൽ (Yellow Raisins) അനുവദനീയമായതിലും എത്രയോ മടങ്ങ് കീടനാശിനി അവശിഷ്ടങ്ങൾ (Pesticide Residues) അടങ്ങിയതായി ലാബ് പരിശോധനയിൽ തെളിഞ്ഞു.
ഭക്ഷ്യവസ്തുക്കളിൽ മായം ചേർത്ത് ഉപഭോക്താക്കളുടെ ജീവൻവെച്ച് പന്താടുന്ന കമ്പനികൾക്കെതിരെ കടുത്ത പിഴയും തടവുശിക്ഷയും ഉറപ്പാക്കുമെന്ന് എഫ്.എസ്.എസ്.എ.ഐ വ്യക്തമാക്കി.