കുവൈത്ത് സിറ്റി: ഫർവാനിയ ഗവർണറേറ്റിലെ ജലീബ് അൽ ഷുയൂഖ് പ്രദേശത്ത് കുവൈത്ത് ആഭ്യന്തര മന്ത്രാലയം വ്യാപക സുരക്ഷാ പരിശോധന നടത്തി. ഫർവാനിയ ഗവർണറേറ്റ് സുരക്ഷാ ഡയറക്ടറേറ്റിന്റെ നേതൃത്വത്തിൽ ബന്ധപ്പെട്ട സർക്കാർ വിഭാഗങ്ങളുമായി ഏകോപിപ്പിച്ചാണ് പരിശോധന സംഘടിപ്പിച്ചത്.
പ്രദേശത്തെ വിവിധ താമസകേന്ദ്രങ്ങൾ, വ്യാപാര സ്ഥാപനങ്ങൾ, റോഡുകൾ, വാഹനങ്ങൾ എന്നിവ കേന്ദ്രീകരിച്ച് സുരക്ഷാ ഉദ്യോഗസ്ഥർ പരിശോധന നടത്തി. വിവിധ കേസുകളിൽ അന്വേഷിച്ചുകൊണ്ടിരുന്നവരെയും നിയമലംഘനം നടത്തിയവരെയും പരിശോധനയിൽ പിടികൂടി.
സുരക്ഷാ പരിശോധനയുടെ ഭാഗമായി വാഹനങ്ങളുടെ രേഖകളും വ്യക്തികളുടെ തിരിച്ചറിയൽ രേഖകളും പരിശോധിച്ചു. വിവിധ തരത്തിലുള്ള നിയമലംഘനങ്ങൾ കണ്ടെത്തി നടപടികൾ സ്വീകരിക്കുകയും ചെയ്തു.
പരിശോധനയുമായി ബന്ധപ്പെട്ട് ആഭ്യന്തര മന്ത്രാലയം പുറത്തുവിട്ട ദൃശ്യങ്ങളിൽ സുരക്ഷാ ഉദ്യോഗസ്ഥരുടെ പരിശോധനകൾ, വിവിധ കേന്ദ്രങ്ങളിൽനിന്ന് കണ്ടെത്തിയ വസ്തുക്കൾ, കസ്റ്റഡിയിലെടുത്ത വ്യക്തികൾ എന്നിവ ഉൾപ്പെട്ടിട്ടുണ്ട്.
പ്രദേശത്തെ പൊതുസുരക്ഷ ഉറപ്പുവരുത്തുന്നതിനും നിയമവിരുദ്ധ പ്രവർത്തനങ്ങൾ തടയുന്നതിനുമായി വിവിധ സർക്കാർ വകുപ്പുകൾ സംയുക്തമായാണ് പരിശോധന നടത്തിയത്.