ദുബായ്: പണം വാങ്ങി വ്യാജ മെഡിക്കൽ അവധി സർട്ടിഫിക്കറ്റുകൾ തയ്യാറാക്കുകയും ജീവനക്കാർക്ക് അനധികൃതമായി ശമ്പളത്തോടുകൂടിയ അവധി ലഭിക്കാൻ സഹായിക്കുകയും ചെയ്ത കേസിൽ സ്വകാര്യ ക്ലിനിക്കിലെ വനിതാ ജീവനക്കാരിയെ ദുബായ് ക്രിമിനൽ കോടതി തടവിന് ശിക്ഷിച്ചു.
ക്ലിനിക്കിന്റെ ഇലക്ട്രോണിക് ആരോഗ്യസംവിധാനം ദുരുപയോഗം ചെയ്താണ് പ്രതി വ്യാജ സർട്ടിഫിക്കറ്റുകൾ തയ്യാറാക്കിയത്. മുൻ തീയതികൾ രേഖപ്പെടുത്തിയ സർട്ടിഫിക്കറ്റുകൾക്ക് ഡോക്ടർമാരുടെ പേരിലുള്ള വ്യാജ ഡിജിറ്റൽ ഒപ്പുകളും ഉപയോഗിച്ചു.
കേസുമായി ബന്ധപ്പെട്ട ചില കൂട്ടുപ്രതികൾക്കും കോടതി ശിക്ഷ വിധിച്ചു. രേഖകളിൽ കൃത്രിമം നടത്തൽ, വിശ്വാസവഞ്ചന, സ്ഥാപനത്തെ വഞ്ചിക്കൽ തുടങ്ങിയ കുറ്റങ്ങളാണ് കേസിൽ പരിഗണിച്ചത്.
ഒരു സ്വകാര്യ കമ്പനിയിലെ ജീവനക്കാർ നിരന്തരം മെഡിക്കൽ അവധി എടുക്കുന്നത് ശ്രദ്ധയിൽപ്പെട്ടതോടെയാണ് സംഭവം പുറത്തുവന്നത്. ഒരേ ക്ലിനിക്കിൽനിന്നുള്ള ഡിജിറ്റൽ സർട്ടിഫിക്കറ്റുകൾ ആവർത്തിച്ച് ഹാജരാക്കിയതോടെ സ്ഥാപനത്തിന്റെ മാനവവിഭവശേഷി വിഭാഗം ആഭ്യന്തര പരിശോധന നടത്തി.
പരിശോധനയിൽ ക്രമക്കേടുകൾ കണ്ടെത്തിയതിനെ തുടർന്ന് ബന്ധപ്പെട്ട അധികൃതരെ വിവരം അറിയിച്ചു. തുടർന്ന് നടന്ന അന്വേഷണത്തിലാണ് വ്യാജ മെഡിക്കൽ രേഖകൾ തയ്യാറാക്കുന്ന സംവിധാനം കണ്ടെത്തിയത്.
ഇലക്ട്രോണിക് ആരോഗ്യരേഖകളുടെ വിശ്വാസ്യത സംരക്ഷിക്കുന്നതിലും വ്യാജ മെഡിക്കൽ സർട്ടിഫിക്കറ്റുകൾ ഉപയോഗിച്ചുള്ള സാമ്പത്തിക തട്ടിപ്പുകൾ തടയുന്നതിലും കോടതി നടപടി പ്രാധാന്യമർഹിക്കുന്നു.