ദോഹ: സൗദി അറേബ്യയിലെ റിയാദ്, ദമ്മാം നഗരങ്ങളിലേക്കും തിരിച്ചുമുള്ള വിമാന സർവീസുകൾ ഒക്ടോബർ 24 വരെ താൽക്കാലികമായി നിർത്തിവയ്ക്കാൻ ഖത്തർ എയർവേയ്‌സ് തീരുമാനിച്ചു. ജിദ്ദയിലേക്കുള്ള പ്രതിദിന വിമാന സർവീസുകളുടെ എണ്ണം ഏഴിൽനിന്ന് നാലായി കുറയ്ക്കാനും തീരുമാനിച്ചിട്ടുണ്ട്.
സൗദി അറേബ്യയിലെ നിലവിലെ സുരക്ഷാ സാഹചര്യങ്ങളും വ്യോമഗതാഗത മേഖലയിലെ നിയന്ത്രണങ്ങളും കണക്കിലെടുത്താണ് വിമാനക്കമ്പനി സർവീസുകളിൽ മാറ്റം വരുത്തിയത്. യാത്രക്കാരുടെയും വിമാന ജീവനക്കാരുടെയും സുരക്ഷയ്ക്കാണ് പരമപ്രധാന പരിഗണന നൽകുന്നതെന്ന് കമ്പനി വ്യക്തമാക്കി.
സർവീസ് റദ്ദാക്കലുകളും സമയക്രമത്തിലെ മാറ്റങ്ങളും ബാധിക്കുന്ന യാത്രക്കാർക്ക് ആവശ്യമായ വിവരങ്ങൾ നേരിട്ട് കൈമാറും. യാത്ര പുറപ്പെടുന്നതിനു മുമ്പ് ഖത്തർ എയർവേയ്‌സിന്റെ ഔദ്യോഗിക വെബ്‌സൈറ്റിലൂടെയോ മൊബൈൽ ആപ്ലിക്കേഷനിലൂടെയോ വിമാനത്തിന്റെ നിലവിലെ സ്ഥിതി പരിശോധിക്കണമെന്ന് അധികൃതർ നിർദേശിച്ചു.
സൗദിയിലെ വിമാനത്താവളങ്ങളുടെ പ്രവർത്തനത്തിൽ ഉണ്ടായ തടസ്സങ്ങൾ വിവിധ അന്താരാഷ്ട്ര വിമാനക്കമ്പനികളുടെ സർവീസുകളെയും ബാധിച്ചിട്ടുണ്ട്. ബന്ധപ്പെട്ട അധികൃതരുമായി ഏകോപനം നടത്തി സാഹചര്യങ്ങൾ വിലയിരുത്തിയ ശേഷമായിരിക്കും സർവീസുകളുടെ പുനരാരംഭം സംബന്ധിച്ച തുടർതീരുമാനങ്ങൾ.