ബാങ്കോക്ക്: അന്താരാഷ്ട്ര നാണയനിധിയുടെയും ലോകബാങ്കിന്റെയും 2026-ലെ വാർഷിക സമ്മേളനങ്ങളോടനുബന്ധിച്ച് തായ്‌ലൻഡിലെ ബാങ്കോക്കിൽ കുവൈത്ത് ബാങ്കിങ് അസോസിയേഷൻ സംഘടിപ്പിച്ച സ്വീകരണച്ചടങ്ങിൽ കുവൈത്തിലെ പ്രമുഖ ബാങ്കുകളുടെ ഉന്നത ഉദ്യോഗസ്ഥരും അന്താരാഷ്ട്ര ധനകാര്യ പ്രതിനിധികളും പങ്കെടുത്തു.
ഒക്ടോബർ 16 വെള്ളിയാഴ്ച വൈകിട്ടാണ് കുവൈത്ത് ബാങ്കുകൾക്കായി പ്രത്യേക സ്വീകരണം സംഘടിപ്പിച്ചത്. കുവൈത്ത് സെൻട്രൽ ബാങ്ക് ഗവർണർ ബാസൽ അൽ ഹാറൂണിന്റെ രക്ഷാധികാരത്തിലും സാന്നിധ്യത്തിലുമായിരുന്നു പരിപാടി.
കുവൈത്ത് ധനമന്ത്രി ഡോ. യാഖൂബ് അൽ റിഫായി, തായ്‌ലൻഡിലെ കുവൈത്ത് അംബാസഡർ ഡോ. മിഷാൽ അൽ മൻസൂർ, വിവിധ അറബ് രാജ്യങ്ങളിലെ സെൻട്രൽ ബാങ്ക് ഗവർണർമാർ, കുവൈത്തിലെ ബാങ്കുകളുടെ ചെയർമാൻമാർ, ചീഫ് എക്സിക്യൂട്ടീവ് ഓഫീസർമാർ, അന്താരാഷ്ട്ര ധനകാര്യ–നിക്ഷേപ രംഗത്തെ പ്രമുഖർ തുടങ്ങിയവർ ചടങ്ങിൽ പങ്കെടുത്തു.
ആഗോള സാമ്പത്തിക രംഗത്തെ മാറ്റങ്ങൾക്കിടയിൽ കുവൈത്ത് ബാങ്കിങ് മേഖലയ്ക്കുള്ള സ്ഥിരതയും സാമ്പത്തിക ശേഷിയും അന്താരാഷ്ട്ര വേദിയിൽ അവതരിപ്പിക്കുന്നതിനുള്ള അവസരമായി പരിപാടി മാറി.
കുവൈത്തിലെ ധനകാര്യ സ്ഥാപനങ്ങളും അന്താരാഷ്ട്ര ബാങ്കിങ്–നിക്ഷേപ സ്ഥാപനങ്ങളും തമ്മിലുള്ള സഹകരണം മെച്ചപ്പെടുത്തുന്നതിനും പുതിയ നിക്ഷേപ സാധ്യതകൾ കണ്ടെത്തുന്നതിനും ചടങ്ങ് പ്രാധാന്യം നൽകി.
ആഗോള സാമ്പത്തിക സംവിധാനത്തിൽ കുവൈത്ത് ബാങ്കുകളുടെ പങ്കാളിത്തം വിപുലീകരിക്കുന്നതും അന്താരാഷ്ട്ര ധനകാര്യ ബന്ധങ്ങൾ കൂടുതൽ ശക്തമാക്കുന്നതും പരിപാടിയുടെ പ്രധാന ലക്ഷ്യങ്ങളായിരുന്നു.
വിവിധ രാജ്യങ്ങളിലെ ധനകാര്യ നയരൂപീകരണ ഉദ്യോഗസ്ഥരുമായി കുവൈത്ത് ബാങ്കിങ് മേഖലയിലെ പ്രതിനിധികൾ ആശയവിനിമയം നടത്തി. അന്താരാഷ്ട്ര സാമ്പത്തിക സഹകരണവും നിക്ഷേപരംഗത്തെ മത്സരക്ഷമതയും വർധിപ്പിക്കാനുള്ള അവസരമായും പരിപാടി വിലയിരുത്തപ്പെട്ടു.