കുവൈത്ത് സിറ്റി: കുവൈത്തിലെ പ്രമുഖ ധനകാര്യ സ്ഥാപനമായ കുവൈത്ത് ഫിനാൻസ് ഹൗസ് (KFH) 2026-ലെ ആദ്യ ഒമ്പത് മാസങ്ങളിൽ ഓഹരി ഉടമകൾക്ക് അവകാശപ്പെട്ട 523.4 ദശലക്ഷം കുവൈത്ത് ദിനാർ അറ്റാദായം രേഖപ്പെടുത്തി. കഴിഞ്ഞ വർഷത്തെ സമാന കാലയളവിനെ അപേക്ഷിച്ച് 6.2 ശതമാനമാണ് ലാഭവർധന.
കുവൈത്ത് ഫിനാൻസ് ഹൗസ് ചെയർമാൻ ഹമദ് അബ്ദുൽ മുഹ്‌സിൻ അൽ മർസൂഖാണ് സാമ്പത്തിക ഫലങ്ങൾ പ്രഖ്യാപിച്ചത്. കുവൈത്തിലെ ബാങ്കിങ് മേഖലയിൽ രേഖപ്പെടുത്തിയ ഏറ്റവും ഉയർന്ന ലാഭമാണിതെന്ന് ബാങ്ക് വ്യക്തമാക്കി.
2026 സെപ്റ്റംബർ അവസാനത്തോടെ ഒരു ഓഹരിയുടെ വരുമാനം 27.56 ഫിൽസായി ഉയർന്നു. കഴിഞ്ഞ വർഷത്തെ അപേക്ഷിച്ച് 5.4 ശതമാനമാണ് വർധന.
ബാങ്കിന്റെ അറ്റ ധനകാര്യ വരുമാനം 989.5 ദശലക്ഷം ദിനാറിലെത്തി. മുൻവർഷത്തെ സമാന കാലയളവിനെ അപേക്ഷിച്ച് 4.8 ശതമാനമാണ് വളർച്ച. മൊത്തം പ്രവർത്തന വരുമാനം 6.7 ശതമാനം വർധിച്ച് 1,452.2 ദശലക്ഷം ദിനാറായി.
ചെലവ് നിയന്ത്രണ നടപടികളുടെ ഭാഗമായി പ്രവർത്തനച്ചെലവിൽ മൂന്ന് ശതമാനം കുറവുണ്ടായി. വിപണിയിലെ സാമ്പത്തിക മാറ്റങ്ങൾക്കിടയിലും സ്ഥിരതയാർന്ന വളർച്ച കൈവരിക്കാൻ ബാങ്കിന് കഴിഞ്ഞതായി ചെയർമാൻ വ്യക്തമാക്കി.
ബാങ്കിന്റെ വിവിധ ബിസിനസ് മേഖലകളിൽ നിന്നുള്ള വരുമാനവർധനയും അന്താരാഷ്ട്ര പ്രവർത്തനങ്ങളുടെ വ്യാപനവും സാമ്പത്തിക നേട്ടത്തിന് സഹായകമായതായി ചീഫ് എക്സിക്യൂട്ടീവ് ഓഫീസർ ഖാലിദ് യൂസഫ് അൽ ഷംലാൻ അറിയിച്ചു.
സാമ്പത്തിക വെല്ലുവിളികൾ നേരിടുന്നതിനൊപ്പം പ്രവർത്തനക്ഷമത മെച്ചപ്പെടുത്താനും നിക്ഷേപകരുടെ വിശ്വാസം നിലനിർത്താനും ബാങ്ക് സ്വീകരിച്ച നടപടികൾ നേട്ടത്തിന് സഹായകരമായതായി അധികൃതർ വ്യക്തമാക്കി.