അങ്കാറ: സൗദി അറേബ്യയും പാകിസ്ഥാനും ഉൾപ്പെടുന്ന മക്ക സംയുക്ത പ്രതിരോധ കരാർ പാർലമെന്റിന്റെ അംഗീകാരത്തിനായി സമർപ്പിക്കാനുള്ള നടപടികൾ തുർക്കി വേഗത്തിലാക്കി. കരാറിന്റെ ആഭ്യന്തര അംഗീകാര നടപടികൾ പൂർത്തിയാക്കുന്നതിനായി പാർലമെന്റിൽ ചർച്ച നടത്തുമെന്ന് തുർക്കി പ്രസിഡന്റ് റജബ് ത്വയ്യിബ് എർദോഗൻ വ്യക്തമാക്കി.
സൗദി അറേബ്യ, പാകിസ്ഥാൻ, തുർക്കി എന്നീ മൂന്ന് രാജ്യങ്ങൾ തമ്മിലുള്ള പരസ്പര പ്രതിരോധ സഹകരണം ശക്തിപ്പെടുത്തുന്നതിനുള്ളതാണ് മക്ക കരാർ. അംഗരാജ്യങ്ങളിൽ ഏതെങ്കിലും ഒന്നിനെതിരെ സായുധ ആക്രമണമുണ്ടായാൽ പരസ്പര പ്രതിരോധ സഹായം നൽകുകയെന്ന വ്യവസ്ഥ കരാറിൽ ഉൾപ്പെടുന്നു.
ഒക്ടോബർ 12ന് മന്ത്രിസഭാ യോഗത്തിനുശേഷം നടത്തിയ പ്രസ്താവനയിലാണ് എർദോഗൻ കരാർ പാർലമെന്റിന് മുന്നിലെത്തിക്കുമെന്ന് വ്യക്തമാക്കിയത്. ഒക്ടോബർ എട്ടിന് വിദേശകാര്യമന്ത്രി ഹകാൻ ഫിദാനും ഇതിനുള്ള തയ്യാറെടുപ്പുകൾ പൂർത്തിയായതായി അറിയിച്ചിരുന്നു.
കരാർ പ്രതിരോധ ആവശ്യങ്ങൾക്കുള്ളതാണെന്നും മറ്റു രാജ്യങ്ങൾക്കെതിരെ ആക്രമണാത്മക സൈനിക നടപടികൾക്ക് അനുമതി നൽകുന്നതല്ലെന്നും ഹകാൻ ഫിദാൻ വിശദീകരിച്ചു.
മധ്യപൂർവദേശത്ത് സുരക്ഷാ വെല്ലുവിളികൾ വർധിച്ചുവരുന്നതിനിടെയാണ് മൂന്ന് രാജ്യങ്ങൾ തമ്മിലുള്ള സൈനിക സഹകരണം കൂടുതൽ ശക്തിപ്പെടുത്താനുള്ള നീക്കം. സൗദി അറേബ്യക്കെതിരായ ഹൂതി ആക്രമണങ്ങളുടെ പശ്ചാത്തലത്തിൽ തുർക്കി സൗദിക്ക് പിന്തുണ ആവർത്തിക്കുകയും ചെയ്തിട്ടുണ്ട്.