കണ്ണൂർ: ന്യൂമാഹിയിൽ വൻ മയക്കുമരുന്ന് വേട്ട. വിപണിയിൽ ലക്ഷങ്ങൾ വിലമതിക്കുന്ന മാരക ലഹരിമരുന്നായ എംഡിഎംഎയുമായി (MDMA) യുവതിയും യുവാവും പൊലീസിന്റെ പിടിയിലായി. തലശ്ശേരി സ്വദേശിനി റുബൈദ, ഇവരുടെ അടുത്ത സുഹൃത്തും കൂട്ടാളിയുമായ അജ്മൽ എന്നിവരെയാണ് ന്യൂമാഹി പൊലീസ് ലഹരിവസ്തുക്കളുമായി പിടികൂടിയത്. പ്രതികളിൽ നിന്ന് 16.5 ഗ്രാം എംഡിഎംഎ പൊലീസ് സംഘം പിടിച്ചെടുത്തു.
ലഹരിമരുന്ന് കടത്തുമായും വിൽപ്പനയുമായും ബന്ധപ്പെട്ട് മുൻപും നിരവധി ക്രിമിനൽ കേസുകളിൽ പ്രതിയായിട്ടുള്ള വ്യക്തിയാണ് അറസ്റ്റിലായ റുബൈദയെന്ന് പൊലീസ് വ്യക്തമാക്കുന്നു. പ്രദേശ കേന്ദ്രീകരിച്ച് ലഹരിവസ്തുക്കൾ എത്തിച്ചു നൽകുന്ന റാക്കറ്റിലെ പ്രധാന കണ്ണിയാണ് ഇവരെന്നാണ് ലഭിക്കുന്ന സൂചന.
ഇവർ അന്തർസംസ്ഥാന ലഹരി കടത്ത് സംഘങ്ങളുമായോ അതോ പ്രാദേശികമായി വ്യാപകമായി ലഹരിവസ്തുക്കൾ വിതരണം ചെയ്യുന്ന വലിയ ശൃംഖലകളുമായോ ബന്ധപ്പെട്ടു പ്രവർത്തിക്കുന്നവരാണോ എന്നത് സംബന്ധിച്ച് പൊലീസ് അന്വേഷണം വിപുലീകരിച്ചിട്ടുണ്ട്. പിടിയിലായ പ്രതികളെ കൂടുതൽ ചോദ്യം ചെയ്തു വരികയാണെന്നും, നിയമനടപടികൾ പൂർത്തിയാക്കി ഇവരെ ഉടൻ തന്നെ കോടതിയിൽ ഹാജരാക്കുമെന്നും ഉന്നത പൊലീസ് ഉദ്യോഗസ്ഥർ അറിയിച്ചു.