രാഹുൽ ഹമ്പിൾ സനൽ
ഷിമോഗ: ഡിജിറ്റൽ യുഗത്തിന്റെ കുതിച്ചുചാട്ടത്തിനിടയിലും ഭാരതത്തിന്റെ പ്രാചീന ഭാഷയായ സംസ്‌കൃതത്തെ തങ്ങളുടെ ദൈനംദിന ആശയവിനിമയ ഭാഷയായി നിലനിർത്തി ലോകശ്രദ്ധ നേടുകയാണ് കർണാടകയിലെ മത്തൂർ ഗ്രാമം.
ഷിമോഗ ജില്ലയിൽ തുങ്കാ നദിക്കരയിൽ സ്ഥിതി ചെയ്യുന്ന ഈ കൊച്ചുഗ്രാമത്തിൽ കുട്ടികളെന്നോ മുതിർന്നവരെന്നോ വ്യത്യാസമില്ലാതെ എല്ലാവരും സംസ്‌കൃതത്തിലാണ് സംസാരിക്കുന്നത്.
കടകളിൽ സാധനങ്ങൾ വാങ്ങാൻ പോകുമ്പോഴും വഴി ചോദിക്കുമ്പോഴും ഫോണിൽ സംസാരിക്കുമ്പോഴുമെല്ലാം ഗ്രാമവാസികൾ സംസ്‌കൃത പദങ്ങളാണ് ഉപയോഗിക്കുന്നത്.
നിത്യജീവിതത്തിൽ പൂർണ്ണമായും സംസ്‌കൃതം ഉപയോഗിക്കുന്ന ലോകത്തിലെ തന്നെ അപൂർവം ഗ്രാമങ്ങളിലൊന്നായാണ് മത്തൂർ അറിയപ്പെടുന്നത്.
പതിറ്റാണ്ടുകൾക്ക് മുൻപ് വരെ കന്നഡയും സങ്കേതി ഭാഷയുമായിരുന്നു ഇവിടെ പ്രധാനം. എന്നാൽ 1980-കളിൽ ആരംഭിച്ച ബോധവൽക്കരണത്തിന്റെയും പരിശീലന പരിപാടികളുടെയും ഫലമായി ഗ്രാമവാസികൾ തങ്ങളുടെ പൊതുഭാഷയായി സംസ്‌കൃതത്തെ സ്വീകരിക്കുകയായിരുന്നു. ദിവസവും വെറും രണ്ട് മണിക്കൂർ വീതം പരിശീലിച്ചാണ് കുട്ടികളും പ്രായമായവരുമടക്കം ഗ്രാമത്തിലെ ഭൂരിഭാഗം ആളുകളും ഈ ഭാഷയിൽ അനായാസമായി സംസാരിക്കാൻ തുടങ്ങിയത്.
ഇന്നത്തെ തലമുറയിലെ കുട്ടികൾ സ്‌കൂളുകളിൽ പഠിക്കുന്നതോടൊപ്പം തന്നെ വീട്ടിലും നാട്ടിലും സംസ്‌കൃതത്തിൽ തന്നെയാണ് സംസാരിക്കുന്നത്. വിദേശ രാജ്യങ്ങളിൽ നിന്നുള്ള സഞ്ചാരികളും ഭാഷാ സ്‌നേഹികളും ഗവേഷകരും സംസ്‌കൃത പഠനത്തിനും ഈ ഗ്രാമത്തിലെ സംസ്കാരം അനുഭവച്ചറിയുന്നതിനുമായി പ്രതിവർഷം ഇവിടെയെത്താറുണ്ട്.
സംസ്‌കൃത ഭാഷ ചരിത്രത്തിന്റെ താളുകളിൽ മാത്രം ഒതുങ്ങേണ്ട ഒന്നല്ലെന്നും, അതൊരു സജീവ സമ്പർക്ക മാധ്യമമായി നിലനിർത്താൻ കഴിയുമെന്നും ലോകത്തിന് കാട്ടിക്കൊടുക്കുകയാണ് ഈ ഗ്രാമം.