തൊടുപുഴ: മാട്ടുപ്പെട്ടിയിൽ കാട്ടാനകളുടെ തീറ്റയും കുടിവെള്ളവും ലഭിക്കുന്ന പ്രദേശങ്ങൾ തടസ്സപ്പെടുത്തി ടൂറിസം പദ്ധതി നടപ്പാക്കുന്നത് ആനകൾ ജനവാസ മേഖലയിലേക്ക് ഇറങ്ങാനുള്ള സാധ്യത വർധിപ്പിക്കുമെന്ന് ഇടുക്കി എസ്.പി.സി.എ വൈസ് പ്രസിഡന്റ് എം.എൻ. ജയചന്ദ്രൻ. ഇതുമൂലം ഉണ്ടാകുന്ന പ്രശ്നങ്ങളുടെ ഉത്തരവാദിത്തം കെ.എൽ.ഡി. ബോർഡിനായിരിക്കുമെന്നും അദ്ദേഹം ആരോപിച്ചു.
മാട്ടുപ്പെട്ടി ഡാമിന്റെ 105 ചതുരശ്ര കിലോമീറ്റർ വരുന്ന കാച്ച്മെന്റ് ഏരിയയിലെ പുൽമേടുകളിലാണ് കാട്ടാനകൾ കൂട്ടത്തോടെ എത്തുന്നത്. വർഷം മുഴുവൻ പച്ചപ്പുള്ള പ്രദേശമായതിനാലും ഡാമിൽനിന്ന് വെള്ളം കുടിക്കാൻ സൗകര്യമുള്ളതിനാലുമാണ് ആനകൾ ഇവിടെ എത്തുന്നതെന്ന് ജയചന്ദ്രൻ പറഞ്ഞു.
കാട്ടാനകൾ കൂട്ടത്തോടെ എത്തുന്ന പ്രദേശമായതിനാൽ 1970-കളിൽ ഇവിടെ ആനപിടിത്തം നടത്തിയിരുന്നു. ആനകൾക്ക് പുല്ല് തിന്നാനും വെള്ളം കുടിക്കാനും സൗകര്യമുള്ള ഈ പ്രദേശം ഇപ്പോൾ അടച്ചുകെട്ടി വിനോദസഞ്ചാരികൾക്കായി തുറന്നുകൊടുക്കുകയാണ്. മൂന്നാർ–ടോപ്പ് സ്റ്റേഷൻ റോഡിന്റെ ഭാഗത്താണ് ഈ പുൽമേടുകൾ സ്ഥിതി ചെയ്യുന്നത്.
കന്നുകാലി വർധനയും വളർത്തലും ലക്ഷ്യമിട്ട് നൽകിയ ഭൂമി വന്യജീവികൾക്ക് ദോഷകരമായ രീതിയിൽ ഉപയോഗിക്കരുതെന്നും പരിസ്ഥിതി പ്രവർത്തകർ ആവശ്യപ്പെട്ടു. മാട്ടുപ്പെട്ടി ഫാമിലെ വൈദ്യുതവേലിയിൽ തട്ടി മുമ്പ് കാട്ടാന ചരിഞ്ഞ സംഭവമുണ്ടായിട്ടും വേലി നീക്കം ചെയ്തിട്ടില്ലെന്നും ജയചന്ദ്രൻ ചൂണ്ടിക്കാട്ടി.
കാട്ടാനകളുടെ സ്വാഭാവിക തീറ്റയും വെള്ളവും ലഭിക്കുന്ന ഇടങ്ങൾ ഇല്ലാതാക്കുന്നത് മനുഷ്യ–വന്യജീവി സംഘർഷം വർധിപ്പിക്കുമെന്ന് സംഘടനകൾ മുന്നറിയിപ്പ് നൽകി. പദ്ധതിയുടെ ഭാഗമായി വന്യജീവികളുടെ ആവാസവ്യവസ്ഥ സംരക്ഷിക്കുന്നതിനുള്ള നടപടികൾ സ്വീകരിക്കണമെന്നും അവർ ആവശ്യപ്പെട്ടു.