വാഷിങ്ടൺ: അറ്റ്ലാന്റിക് മഹാസമുദ്രത്തിന്റെ പേര് ‘ട്രംപ് ഓഷ്യൻ’ എന്നാക്കി മാറ്റണമെന്ന അമേരിക്കൻ പ്രസിഡന്റ് ഡൊണാൾഡ് ട്രംപിന്റെ നിർദേശം ഗൂഗിൾ സിഇഒ സുന്ദർ പിച്ചൈ നിരസിച്ചതായി ട്രംപ്. ദക്ഷിണ കരോലിനയിൽ നടന്ന റാലിക്കിടെയാണ് ട്രംപ് ഇക്കാര്യം വെളിപ്പെടുത്തിയത്.
അറ്റ്ലാന്റിക് മഹാസമുദ്രത്തിന്റെ പേര് മാറ്റി ‘ട്രംപ് ഓഷ്യൻ’ എന്നോ ‘ഓഷ്യൻ ഓഫ് ദി അമേരിക്കാസ്’ എന്നോ ആക്കണമെന്ന് താൻ ഗൂഗിൾ മേധാവിയോട് ആവശ്യപ്പെട്ടതായി ട്രംപ് പറഞ്ഞു. എന്നാൽ, ‘നോ, നോ, നോ. ഇത്തവണ അതിന് കഴിയില്ല’ എന്നായിരുന്നു പിച്ചൈയുടെ മറുപടിയെന്ന് ട്രംപ് അവകാശപ്പെട്ടു.
നിരവധി രാജ്യങ്ങളുടെ തീരങ്ങളുമായി ബന്ധപ്പെട്ടുകിടക്കുന്ന മഹാസമുദ്രത്തിന്റെ പേര് മാറ്റുന്നത് പ്രായോഗികമല്ലെന്ന നിലപാടാണ് പിച്ചൈ സ്വീകരിച്ചതെന്നാണ് ട്രംപിന്റെ വിശദീകരണം. ഇതോടെ പേര് മാറ്റാനുള്ള നിർദേശം ഉപേക്ഷിച്ചതായും ട്രംപ് പറഞ്ഞു.
നേരത്തെ മെക്സിക്കോ ഉൾക്കടലിനെ ‘ഗൾഫ് ഓഫ് അമേരിക്ക’ എന്നാക്കി മാറ്റാനുള്ള നീക്കത്തെക്കുറിച്ചും ട്രംപ് പരാമർശിച്ചു. അമേരിക്കയിൽ ഉപയോഗിക്കുന്ന ചില ഭൂപേരുകൾ മാറ്റിയതിന്റെ പശ്ചാത്തലത്തിലാണ് അറ്റ്ലാന്റിക് മഹാസമുദ്രത്തിന്റെ പേരും മാറ്റണമെന്ന നിർദേശം ഉയർന്നത്.
എന്നാൽ, അറ്റ്ലാന്റിക് മഹാസമുദ്രത്തിന്റെ പേര് മാറ്റിയതായി ഔദ്യോഗിക പ്രഖ്യാപനമൊന്നും ഉണ്ടായിട്ടില്ല. ട്രംപ് നടത്തിയ വെളിപ്പെടുത്തലിനോട് ഗൂഗിളും സുന്ദർ പിച്ചൈയും ഔദ്യോഗികമായി പ്രതികരിച്ചിട്ടില്ല.