കീവ്: അമേരിക്കൻ പ്രതിരോധ വകുപ്പിന്റെ ധനസഹായത്തോടെ പ്രവർത്തിക്കുന്ന ഉപഗ്രഹ ഇന്റർനെറ്റ് സംവിധാനമായ സ്റ്റാർഷീൽഡുമായുള്ള ബന്ധം തടസ്സപ്പെട്ടതിനെ തുടർന്ന് ഒരു മില്യൺ ഡോളറിലധികം വിലവരുന്ന ഡ്രോണുകൾ നഷ്ടമായെന്ന് യുക്രെയ്ൻ സൈനിക ഉദ്യോഗസ്ഥൻ. റഷ്യൻ സൈനിക കേന്ദ്രങ്ങൾ ലക്ഷ്യമാക്കി നീങ്ങിയിരുന്ന ഡ്രോണുകളുടെ ദൃശ്യസംപ്രേഷണം പെട്ടെന്ന് നിലച്ചതായും തുടർന്ന് പലതും തകർന്നുവീണതായും കമാൻഡർ ഒലെഹിനെ ഉദ്ധരിച്ച് മാധ്യമങ്ങൾ റിപ്പോർട്ട് ചെയ്തു.
കഴിഞ്ഞ ആഴ്ചയുണ്ടായ സംഭവത്തെ തുടർന്ന് ഒലെഹിന്റെ സൈനിക വിഭാഗത്തിന് മൂന്ന് ദിവസത്തേക്ക് മിക്ക പ്രവർത്തനങ്ങളും നിർത്തിവെക്കേണ്ടിവന്നെന്നാണ് വിവരം. റഷ്യൻ കമാൻഡ് കേന്ദ്രങ്ങൾക്കും ഇന്ധന സംഭരണ കേന്ദ്രങ്ങൾക്കും നേരെയുള്ള ആക്രമണങ്ങളും ഇതിൽ ഉൾപ്പെടുന്നു. യുക്രെയ്ൻ സൈന്യത്തിന്റെ ഡ്രോൺ പ്രവർത്തനങ്ങളിൽ ഉപഗ്രഹ ആശയവിനിമയ സംവിധാനങ്ങൾ എത്രത്തോളം നിർണായകമാണെന്ന് സംഭവം വ്യക്തമാക്കുന്നതായാണ് വിലയിരുത്തൽ.
ഡ്രോണുകളുടെ വേഗപരിധിയും നിയന്ത്രണങ്ങളും
സ്റ്റാർഷീൽഡ് ബന്ധം തടസ്സപ്പെട്ടതിനു പിന്നാലെ ഡ്രോണുകൾ മണിക്കൂറിൽ ഏകദേശം 40 മൈൽ വേഗത്തിൽ സഞ്ചരിക്കുമ്പോൾ പോലും ബന്ധം നഷ്ടപ്പെടുന്ന സാഹചര്യമുണ്ടായെന്നാണ് യുക്രെയ്ൻ ഉദ്യോഗസ്ഥർ പറയുന്നത്. നിലവിൽ മണിക്കൂറിൽ 100 മൈൽ വേഗപരിധി നിലവിലുണ്ടെങ്കിലും അത് മുമ്പ് കർശനമായി നടപ്പാക്കിയിരുന്നില്ലെന്നും റിപ്പോർട്ടിൽ പറയുന്നു.
കിഴക്കൻ മേഖലയിൽ യുക്രെയ്ൻ സൈനിക വിഭാഗങ്ങളുടെ ചുമതലയുള്ള ബ്രിഗേഡിയർ ജനറൽ ആൻഡ്രി ബിലെറ്റ്സ്കി, നേരത്തെ സ്റ്റാർഷീൽഡ് ഉപയോഗിച്ച ഡ്രോണുകൾ മണിക്കൂറിൽ 250 മൈൽ വരെ വേഗത്തിൽ സഞ്ചരിച്ചാലും ബന്ധം നഷ്ടപ്പെടാറില്ലെന്ന് പറഞ്ഞു. പുതിയ നിയന്ത്രണങ്ങൾ അതിവേഗ ഡ്രോൺ പ്രവർത്തനങ്ങളെ ബാധിക്കുന്നുണ്ട്.
റഷ്യൻ ഡ്രോണുകളെ തടയാൻ ഉപയോഗിക്കുന്ന ഇന്റർസെപ്റ്റർ ഡ്രോണുകൾക്കും ഉയർന്ന വേഗം ആവശ്യമാണ്. അതിനാൽ വേഗപരിധി കുറയ്ക്കുന്നത് യുക്രെയ്ൻ നഗരങ്ങളുടെ വ്യോമപ്രതിരോധത്തെ ബാധിക്കുമെന്ന് ബിലെറ്റ്സ്കി മുന്നറിയിപ്പ് നൽകി.
അമേരിക്കയുടെ നിലപാട്
റഷ്യൻ എണ്ണശുദ്ധീകരണശാലകൾക്ക് നേരെയുള്ള യുക്രെയ്ൻ ആക്രമണങ്ങൾക്ക് തിരിച്ചടിയായാണ് ഉപഗ്രഹ സേവനത്തിൽ നിയന്ത്രണങ്ങൾ ഏർപ്പെടുത്തിയതെന്ന ആശങ്ക യുക്രെയ്ൻ ഉദ്യോഗസ്ഥർ പ്രകടിപ്പിച്ചു. യുദ്ധം അവസാനിപ്പിക്കുന്നതിനുള്ള കരാറിലേക്ക് യുക്രെയ്‌നെ സമ്മർദത്തിലാക്കാനാണ് നീക്കമെന്നും അവർ സംശയിക്കുന്നു.
എന്നാൽ അമേരിക്കൻ ഭരണകൂടം മനഃപൂർവം ഉപഗ്രഹ സേവനം തടസ്സപ്പെടുത്തിയെന്ന ആരോപണം നിഷേധിച്ചിട്ടുണ്ട്. വൈറ്റ് ഹൗസ് ഉദ്യോഗസ്ഥൻ യുക്രെയ്‌നിലെ ഉപഗ്രഹ ഇന്റർനെറ്റ് സേവനങ്ങളിൽ മാറ്റമുണ്ടായിട്ടില്ലെന്ന് പറഞ്ഞതായി റിപ്പോർട്ടിൽ പറയുന്നു. പ്രസിഡന്റ് ഡൊണാൾഡ് ട്രംപും സേവനത്തിലെ മാറ്റങ്ങൾ തന്റെ നിർദേശപ്രകാരമല്ലെന്ന് വ്യക്തമാക്കിയിട്ടുണ്ട്.
സ്റ്റാർഷീൽഡ് സേവനം തടസ്സപ്പെട്ടത് യുക്രെയ്‌നിലെ സൈനിക പ്രവർത്തനങ്ങളെ ബാധിച്ചുവെന്ന റിപ്പോർട്ടുകൾക്കിടെ, അമേരിക്കൻ സ്റ്റേറ്റ് സെക്രട്ടറി മാർക്കോ റൂബിയോ നിയന്ത്രണം സംബന്ധിച്ച സംഭവം ഉണ്ടായതായി അംഗീകരിക്കുകയും സേവനം പിന്നീട് പുനഃസ്ഥാപിച്ചതായി തനിക്ക് അറിയാമെന്നും പറയുകയും ചെയ്തതായി റിപ്പോർട്ടിൽ പറയുന്നു.
സെലൻസ്കി അമേരിക്കയോട് വിശദീകരണം തേടി
സ്റ്റാർഷീൽഡുമായി ബന്ധപ്പെട്ട നിയന്ത്രണങ്ങളെ ‘ആസൂത്രിത നീക്കം’ എന്നാണ് യുക്രെയ്ൻ പ്രസിഡന്റ് വൊളോഡിമിർ സെലൻസ്കി വിശേഷിപ്പിച്ചത്. ഉപഗ്രഹ സേവനം, മിസൈൽ പ്രതിരോധ സംവിധാനങ്ങൾ, റഷ്യൻ ആക്രമണ മുന്നറിയിപ്പുകൾ എന്നിവയെക്കുറിച്ച് റൂബിയോയുമായി ചർച്ച നടത്തിയതായും അദ്ദേഹം പറഞ്ഞു.
അമേരിക്ക യുക്രെയ്‌നിന് ആക്രമണ മുന്നറിയിപ്പുകൾ മനഃപൂർവം നിഷേധിച്ചിട്ടില്ലെന്ന് റൂബിയോ പ്രതികരിച്ചു. പാട്രിയറ്റ് മിസൈൽ പ്രതിരോധ സംവിധാനങ്ങൾ ലോകമെമ്പാടും ക്ഷാമത്തിലാണെന്നും അദ്ദേഹം ചൂണ്ടിക്കാട്ടി.
റഷ്യൻ സൈന്യത്തിന് ആശ്വാസമെന്ന് യുക്രെയ്ൻ കമാൻഡർ
സ്റ്റാർഷീൽഡ് സേവനത്തിലെ തടസ്സം റഷ്യൻ സൈന്യത്തിന് യുക്രെയ്ൻ ഡ്രോൺ ആക്രമണങ്ങളിൽ നിന്ന് താൽക്കാലിക ആശ്വാസം നൽകിയെന്ന് യുക്രെയ്‌ന്റെ 23-ാം അസോൾട്ട് റെജിമെന്റിലെ കമ്പനി കമാൻഡർ യൂറി ബുതുസോവ് പറഞ്ഞു.
“സ്റ്റാർഷീൽഡ് ഇല്ലാത്ത ആ ദിവസം റഷ്യയ്ക്ക് നിരവധി ജീവനും വാഹനങ്ങളും രക്ഷിക്കാൻ സഹായിച്ചു,” എന്നായിരുന്നു അദ്ദേഹത്തിന്റെ പ്രതികരണം. ഡ്രോണുകളുടെ നഷ്ടം മാത്രമല്ല, യുക്രെയ്ൻ സൈനികരുടെ ജീവഹാനിയും വർധിക്കാമെന്ന ആശങ്കയും അദ്ദേഹം പ്രകടിപ്പിച്ചു.
Image credit:routers