തായ്‌ലൻഡ്: വിനോദസഞ്ചാരിയുടെ സാധാരണ ഫോട്ടോ സമൂഹമാധ്യമങ്ങളിൽ പങ്കുവെച്ചതിലൂടെ തായ്‌ലൻഡിൽ 12 കോടി വർഷം പഴക്കമുള്ള ദിനോസർ കാൽപ്പാടുകൾ കണ്ടെത്തി. പ്രകൃതിനടത്തത്തിനിടെ പാറയിൽ കണ്ട അസാധാരണ അടയാളങ്ങൾ ദിനോസറുകളുടേതാണെന്ന് സംശയിച്ച് ചിത്രമെടുത്ത് ഫേസ്ബുക്കിൽ പങ്കുവെച്ചതോടെയാണ് സംഭവം ശ്രദ്ധയിൽപ്പെട്ടത്.
ഫോട്ടോകൾ ശ്രദ്ധയിൽപ്പെട്ടതിനെ തുടർന്ന് വിദഗ്ധർ സ്ഥലത്തെത്തി പരിശോധന നടത്തി. പാറയിൽ പതിഞ്ഞ അടയാളങ്ങൾ ദിനോസറുകളുടെ കാൽപ്പാടുകളാണെന്ന് പരിശോധനയിൽ സ്ഥിരീകരിച്ചതായാണ് റിപ്പോർട്ട്. കണ്ടെത്തൽ പ്രദേശത്തെ പ്രാചീന ജീവജാലങ്ങളുടെ സാന്നിധ്യത്തെക്കുറിച്ച് കൂടുതൽ പഠനങ്ങൾക്ക് വഴിയൊരുക്കുമെന്നാണ് വിലയിരുത്തൽ.
ശാസ്ത്രീയ പരിശോധനകൾക്കും പൈതൃക സംരക്ഷണത്തിനുമായി അധികൃതർ കണ്ടെത്തൽ നടന്ന പ്രദേശം സുരക്ഷിതമാക്കാനുള്ള നടപടികൾ സ്വീകരിച്ചതായും റിപ്പോർട്ടിൽ പറയുന്നു. സാധാരണ യാത്രയ്ക്കിടെ ശ്രദ്ധയിൽപ്പെട്ട ഒരു കാഴ്ച സമൂഹമാധ്യമങ്ങളിലൂടെ പങ്കുവെച്ചത് പ്രധാനപ്പെട്ട ശാസ്ത്രീയ കണ്ടെത്തലിലേക്ക് നയിക്കുകയായിരുന്നു.