2028 ജൂൺ മുതൽ നിരോധനം; സിറ്റി കൗൺസിലിൽ ബില്ലിന് 40–7 വോട്ടിന്റെ പിന്തുണ
ന്യൂയോർക്ക്: ഇന്ത്യൻ വിനോദസഞ്ചാരിയായ 18-കാരൻ കുതിരവണ്ടിയിൽനിന്ന് വീണ് മരിച്ചതിനു പിന്നാലെ ന്യൂയോർക്ക് നഗരത്തിൽ കുതിരവണ്ടി സവാരി നിരോധിക്കാൻ തീരുമാനം. 2028 ജൂൺ മുതൽ നിരോധനം പ്രാബല്യത്തിൽ വരും. നഗരത്തിലെ ദീർഘകാല വിനോദസഞ്ചാര ആകർഷണവും ചരിത്രപരമായ വ്യവസായവുമായ കുതിരവണ്ടി സർവീസുകൾ ഇതോടെ അവസാനിക്കും.
വ്യാഴാഴ്ച നടന്ന സിറ്റി കൗൺസിൽ വോട്ടെടുപ്പിൽ നിരോധന ബില്ലിനെ 40 അംഗങ്ങൾ പിന്തുണച്ചു. ഏഴ് പേർ എതിർത്തപ്പോൾ രണ്ട് അംഗങ്ങൾ വോട്ടെടുപ്പിൽനിന്ന് വിട്ടുനിന്നു. മേയർ സൊഹ്റാൻ മംദാനിയുടെ പിന്തുണയോടെയാണ് നിയമനിർമാണ നടപടി.
ന്യൂയോർക്ക് നഗരവീഥികളിലും സെൻട്രൽ പാർക്കിലും വിനോദസഞ്ചാരികൾക്കായി കുതിരവണ്ടി സവാരി നടത്തുന്ന പതിവ് വർഷങ്ങളായി നിലനിൽക്കുന്നു. എന്നാൽ സുരക്ഷാ ആശങ്കകളും മൃഗക്ഷേമവുമായി ബന്ധപ്പെട്ട വിമർശനങ്ങളും നിരോധനത്തിനായുള്ള ആവശ്യങ്ങൾ ശക്തമാക്കിയിരുന്നു.
ഇന്ത്യൻ വിനോദസഞ്ചാരിയുടെ മരണമാണ് നിരോധനത്തിനുള്ള പിന്തുണ വർധിപ്പിച്ചതെന്ന് റിപ്പോർട്ടുകൾ പറയുന്നു. സംഭവത്തിൽ കുതിരവണ്ടിയിൽനിന്ന് തെറിച്ചുവീണ 18-കാരൻ മരിച്ചതോടെയാണ് നഗരത്തിലെ കുതിരവണ്ടി സർവീസുകളുടെ സുരക്ഷയെക്കുറിച്ചുള്ള ചർച്ച വീണ്ടും ശക്തമായത്.
2028 ജൂണിൽ നിരോധനം നടപ്പിലാകുന്നതോടെ ന്യൂയോർക്കിലെ ചരിത്രപരമായ കുതിരവണ്ടി വ്യവസായത്തിന് അവസാനമാകും.