പ്രയാഗ്‌രാജ്: സ്വത്ത് തർക്കത്തിന്റെ പേരിൽ ഒരാൾക്ക് വൈദ്യുതി കണക്ഷൻ നിഷേധിക്കാനാവില്ലെന്ന് അലഹബാദ് ഹൈക്കോടതി. വൈദ്യുതി പോലുള്ള അടിസ്ഥാന സൗകര്യങ്ങൾ തടഞ്ഞുവെച്ച് സ്വത്തുമായി ബന്ധപ്പെട്ട തർക്കങ്ങൾ പരിഹരിക്കാൻ അധികൃതർക്ക് കഴിയില്ലെന്ന് കോടതി വ്യക്തമാക്കി.
സ്വത്തിന്റെ ഉടമസ്ഥാവകാശമോ കൈവശാവകാശമോ സംബന്ധിച്ച് തർക്കമുണ്ടെന്ന കാരണത്താൽ മാത്രം വൈദ്യുതി വിതരണം തടയുന്നത് അംഗീകരിക്കാനാവില്ലെന്നാണ് കോടതിയുടെ നിലപാട്. ഇത്തരം തർക്കങ്ങൾ നിയമപരമായ നടപടികളിലൂടെ പരിഹരിക്കേണ്ടതാണ്.
വൈദ്യുതി ലഭ്യതയുമായി ബന്ധപ്പെട്ട പരാതികൾ പരിഗണിക്കുമ്പോൾ പൗരന്മാരുടെ അവകാശങ്ങളും ബന്ധപ്പെട്ട നിയമവ്യവസ്ഥകളും അധികൃതർ കണക്കിലെടുക്കണമെന്നും കോടതി നിരീക്ഷിച്ചു.
സ്വത്ത് തർക്കങ്ങൾ നിലനിൽക്കുന്ന സാഹചര്യത്തിൽ വൈദ്യുതി കണക്ഷൻ ലഭിക്കുന്നതിനോ നിലവിലുള്ള വൈദ്യുതി വിതരണം തുടരുന്നതിനോ ബുദ്ധിമുട്ട് നേരിടുന്നവർക്ക് ഈ നിരീക്ഷണം ആശ്വാസമാകുമെന്നാണ് വിലയിരുത്തൽ.