തിരുവനന്തപുരം: വിദ്യാർത്ഥികൾക്കിടയിൽ വർദ്ധിച്ചുവരുന്ന ആത്മഹത്യാ പ്രവണത തടയുന്നതിനായി രാജ്യത്ത് മാതൃകാപരമായ ഒരു നീക്കത്തിന് തുടക്കമായിരിക്കുന്നു.
ക്യാമ്പസുകളിലെയും ഹോസ്റ്റലുകളിലെയും ആത്മഹത്യകൾ വലിയ ആശങ്കയ്ക്ക് വഴിവെക്കുന്ന പശ്ചാത്തലത്തിൽ, വിദ്യാർത്ഥികളുടെ സുരക്ഷ ഉറപ്പാക്കാനായി പ്രത്യേക 'സേഫ്റ്റി ഫാനുകൾ' (Safety Fans) സ്ഥാപിക്കാനുള്ള തീരുമാനവുമായി ഗുജറാത്ത് സർവകലാശാല രംഗത്തെത്തിയിരിക്കുകയാണ്.
പരമ്പരാഗത സീലിംഗ് ഫാനുകളിൽ നിന്ന് തികച്ചും വ്യത്യസ്തമായ രൂപകൽപ്പനയാണ് ഈ സേഫ്റ്റി ഫാനുകൾക്കുള്ളത്.
വിദ്യാർത്ഥികൾ മാനസിക സംഘർഷങ്ങളുടെയോ മറ്റ് കാരണങ്ങളുടെയോ ഭാഗമായി അപകടകരമായ തീരുമാനങ്ങളിലേക്ക് നീങ്ങുമ്പോൾ ഫാനുകൾ തൂങ്ങി നിൽക്കുന്നതിൽ നിന്ന് തടയുന്ന പ്രത്യേക സ്പ്രിംഗ് മെക്കാനിസമാണ് ഇവയിൽ സജ്ജീകരിച്ചിരിക്കുന്നത്.
ഒരു നിശ്ചിത ഭാരത്തിൽ കൂടുതൽ ഭാരം ഫാനിൽ പ്രയോഗിക്കപ്പെട്ടാൽ ഫാനിന്റെ ഹുക്ക് അല്ലെങ്കിൽ റോഡ് താഴേക്ക് ഊർന്നുപോവുകയോ, അല്ലെങ്കിൽ ഭാരം താങ്ങാനാകാതെ സ്പ്രിംഗ് താഴേക്ക് താഴുകയോ ചെയ്യുന്ന രീതിയിലാണ് ഇതിന്റെ ഘടന.
ഇത് വഴി വലിയ ദുരന്തങ്ങൾ ഒഴിവാക്കാൻ സാധിക്കുമെന്നാണ് അധികൃതരുടെ വിലയിരുത്തൽ.
രാജ്യത്തിന്റെ വിവിധ ഭാഗങ്ങളിലെ പ്രമുഖ വിദ്യാഭ്യാസ സ്ഥാപനങ്ങളിൽ വിദ്യാർത്ഥികൾക്കിടയിൽ ജീവനൊടുക്കുന്ന സംഭവങ്ങൾ വർദ്ധിച്ചുവരുന്നത് വലിയ ചർച്ചകൾക്ക് വഴിവെച്ചിരുന്നു.
ഇതിന്റെ പശ്ചാത്തലത്തിൽ വിദ്യാഭ്യാസ വിദഗ്ധരും മാനസികാരോഗ്യ വിദഗ്ധരും നൽകിയ നിർദ്ദേശങ്ങളെത്തുടർന്നാണ് ഹോസ്റ്റൽ മുറികളിൽ സുരക്ഷാ മുൻകരുതലുകൾ ശക്തമാക്കാൻ സർവ്വകലാശാലകൾ തയ്യാറെടുക്കുന്നത്.
ഇതിന്റെ ആദ്യഘട്ടമായാണ് ഹോസ്റ്റൽ മുറികളിലെ സീലിംഗ് ഫാനുകൾ മാറ്റി സേഫ്റ്റി ഫാനുകൾ ഘടിപ്പിക്കുന്നത്.
സാങ്കേതിക മാറ്റങ്ങൾക്കൊപ്പം വിദ്യാർത്ഥികളുടെ മാനസിക സമ്മർദ്ദം കുറയ്ക്കുന്നതിനുള്ള കൗൺസിലിംഗ് സെന്ററുകളും ക്യാമ്പസുകളിൽ സജീവമാക്കണമെന്ന് ആവശ്യമുയരുന്നുണ്ട്.
എങ്കിലും, പെട്ടെന്ന് ഉണ്ടാകുന്ന മാനസികാഘാതങ്ങളിൽ ജീവൻ നഷ്ടപ്പെടുന്നത് തടയാൻ ഇത്തരം സാങ്കേതിക മുന്നറിയിപ്പുകളും സുരക്ഷാ സംവിധാനങ്ങളും വലിയൊരു പരിഹാരമാകുമെന്ന പ്രതീക്ഷയിലാണ് രക്ഷിതാക്കളും പൊതുജനങ്ങളും.
രാജ്യത്തെ മറ്റ് സർവ്വകലാശാലകളും ഈ മാതൃക പിന്തുടരുമെന്നാണ് കരുതപ്പെടുന്നത്.