വാഷിങ്ടൺ: നിർമിതബുദ്ധി സാങ്കേതികവിദ്യയിലും അനുബന്ധ അടിസ്ഥാനസൗകര്യങ്ങളിലും നിക്ഷേപം വർധിപ്പിക്കുന്നതിനായി മെറ്റ പ്ലാറ്റ്‌ഫോംസ് 95 ബില്യൺ ഡോളർ വരെ സമാഹരിക്കാൻ പദ്ധതിയിടുന്നു. ഫെയ്‌സ്ബുക്ക്, ഇൻസ്റ്റഗ്രാം, വാട്‌സ്ആപ്പ് എന്നിവയുടെ മാതൃസ്ഥാപനമായ മെറ്റ ഓഹരിവിൽപ്പനയിലൂടെയാണ് ആവശ്യമായ മൂലധനം കണ്ടെത്തുന്നത്.
ധനസമാഹരണത്തിന്റെ ആദ്യഘട്ടത്തിൽ 35 ബില്യൺ ഡോളറിന്റെ ഓഹരിവിൽപ്പനയാണ് ഉദ്ദേശിക്കുന്നത്. ഇതിനു പുറമേ, വിപണിയിൽ ഘട്ടംഘട്ടമായി ഓഹരികൾ വിറ്റ് 60 ബില്യൺ ഡോളർ വരെ സമാഹരിക്കുന്ന പ്രത്യേക പരിപാടിയും പദ്ധതിയിലുണ്ട്. രണ്ടും ചേർന്നാണ് പരമാവധി 95 ബില്യൺ ഡോളർ എന്ന ലക്ഷ്യം നിശ്ചയിച്ചിരിക്കുന്നത്.
നിർമിതബുദ്ധി സംവിധാനങ്ങളുടെ വികസനത്തിനാവശ്യമായ ഡേറ്റാ സെന്ററുകൾ, ഉയർന്ന ശേഷിയുള്ള കംപ്യൂട്ടിങ് സൗകര്യങ്ങൾ, അനുബന്ധ സാങ്കേതിക അടിസ്ഥാനസൗകര്യങ്ങൾ എന്നിവയിലെ നിക്ഷേപത്തിനാണ് ധനസമാഹരണം പിന്തുണ നൽകുക. സാധാരണ ഓഹരികളും മുൻഗണനാ ഓഹരികളും ഉൾപ്പെടുന്ന വിൽപ്പനയിലൂടെയാണ് മൂലധനം കണ്ടെത്താനുള്ള നീക്കം. പ്രഖ്യാപിച്ച തുക സമാഹരിച്ചുകഴിഞ്ഞതല്ല; കമ്പനിയുടെ ധനസമാഹരണ ലക്ഷ്യമാണ് 95 ബില്യൺ ഡോളർ.