ലഖ്‌നൗ: ഡിജിറ്റൽ യുഗത്തിൽ പൗരന്മാരുടെ സുരക്ഷ ഉറപ്പാക്കുന്നതിനായി സംസ്ഥാനത്തെ ക്രമസമാധാന നിർവ്വഹണത്തിലും അന്വേഷണ മികവിലും ചരിത്രപരമായ മുന്നേറ്റവുമായി ഉത്തർപ്രദേശ് സർക്കാർ. ഓൺലൈൻ തട്ടിപ്പുകൾക്കും സൈബർ അക്രമങ്ങൾക്കും തടയിടുന്നതിനായി സംസ്ഥാനത്തെ എല്ലാ 75 ജില്ലകളിലും പ്രത്യേക സൈബർ പൊലീസ് സ്റ്റേഷനുകൾ പ്രവർത്തനം ആരംഭിച്ചു. മുൻപ് രണ്ട് സൈബർ സ്റ്റേഷനുകൾ മാത്രം ഉണ്ടായിരുന്ന സ്ഥാനത്താണ് ഈ സമഗ്രമായ മാറ്റം. ഇതിനോടൊപ്പം ഡിവിഷൻ തലങ്ങളിൽ അത്യാധുനിക ഫോറൻസിക് ലബോറട്ടറികളും സജ്ജമാക്കിയിട്ടുണ്ട്.
ലഖ്‌നൗവിൽ നടന്ന 'ടെക്‌സംഗം 2026' (TechSangam 2026) ഉച്ചകോടിയിലാണ് ഉത്തർപ്രദേശ് മുഖ്യമന്ത്രി യോഗി ആദിത്യനാഥ് ഈ പ്രധാന പ്രഖ്യാപനം നടത്തിയത്. ഡിജിറ്റൽ സാങ്കേതികവിദ്യകളുടെ വളർച്ച സാധാരണക്കാരുടെ ജീവിതം എളുപ്പമാക്കുന്നതിനോടൊപ്പം തന്നെ ഓൺലൈൻ സാമ്പത്തിക തട്ടിപ്പുകൾ വർധിക്കാൻ കാരണമായിട്ടുണ്ടെന്നും, ശാസ്ത്രീയ അന്വേഷണ രീതികളിലൂടെ ഇത്തരം കുറ്റകൃത്യങ്ങളിൽ ഏർപ്പെടുന്നവർ ശിക്ഷിക്കപ്പെടുന്ന നിരക്ക് വർദ്ധിപ്പിക്കാൻ സാധിച്ചിട്ടുണ്ടെന്നും അദ്ദേഹം വ്യക്തമാക്കി.
ഡിജിറ്റൽ തെളിവുകൾ വേഗത്തിൽ വിശകലനം ചെയ്യുന്നതിനായി ഫോറൻസിക് ലാബുകൾ വികസിപ്പിച്ചതിന് പുറമെ, സങ്കീർണ്ണമായ സൈബർ തട്ടിപ്പുകളും ക്രിമിനൽ ശൃംഖലകളും എളുപ്പത്തിൽ കണ്ടെത്തുന്നതിനായി ആർട്ടിഫിഷ്യൽ ഇന്റലിജൻസ് (AI) അധിഷ്ഠിത സാങ്കേതികവിദ്യകളും പ്രത്യേക മൊബൈൽ ഫോറൻസിക് യൂണിറ്റുകളും പൊലീസ് സേന പ്രയോജനപ്പെടുത്തി വരുന്നുണ്ട്.
പൗരന്മാരുടെ ഡിജിറ്റൽ സുരക്ഷയും സുതാര്യമായ നീതിനിർവ്വഹണവും ഉറപ്പാക്കി, ഐ.ടി മേഖലയുടെ പങ്കാളിത്തത്തോടെ 'ആത്മനിർഭർ ഭാരതം' എന്ന ലക്ഷ്യത്തിലേക്ക് സംസ്ഥാനത്തിന് മികച്ച സംഭാവന നൽകാൻ ഈ പുതിയ പരിഷ്കാരങ്ങളിലൂടെ സാധിക്കുമെന്നും മുഖ്യമന്ത്രി ചൂണ്ടിക്കാട്ടി.