കുവൈത്ത് സിറ്റി: സാമ്പത്തിക തട്ടിപ്പിനും ശല്യപ്പെടുത്തലിനുമായി എത്തുന്ന ഫോൺകോളുകൾ നിയന്ത്രിക്കാൻ സ്മാർട്ട്ഫോണുകളിലെ സുരക്ഷാ സൗകര്യങ്ങൾ പ്രയോജനപ്പെടുത്താം. നമ്പറുകൾ ബ്ലോക്ക് ചെയ്യുക, പരിചയമില്ലാത്ത നമ്പറുകളിൽനിന്നുള്ള കോളുകൾ നിശ്ശബ്ദമാക്കുക, സംശയാസ്പദമായ കോളുകൾ ഫിൽട്ടർ ചെയ്യുക തുടങ്ങിയ സംവിധാനങ്ങളാണ് ഫോണുകളിൽ ലഭ്യമായിട്ടുള്ളത്.
ആപ്പിളിന്റെയും ഗൂഗിളിന്റെയും ഔദ്യോഗിക മാർഗനിർദേശങ്ങൾ അടിസ്ഥാനമാക്കിയാണ് ഇത്തരം സൗകര്യങ്ങൾ ഉപയോഗിക്കുന്ന രീതികൾ വാർത്തയിൽ വിശദീകരിക്കുന്നത്. ഓപ്പറേറ്റിങ് സിസ്റ്റം, ഫോണിന്റെ മോഡൽ, ടെലികോം സേവനദാതാവ് എന്നിവയ്ക്കനുസരിച്ച് ലഭ്യമായ സംവിധാനങ്ങളിലും ക്രമീകരണങ്ങളിലും വ്യത്യാസമുണ്ടാകും.
ഐഫോണിൽ ‘സെറ്റിങ്സ്’ തുറന്ന് ‘ആപ്പുകൾ’ എന്ന വിഭാഗത്തിൽ ‘ഫോൺ’ തിരഞ്ഞെടുക്കുകയും ‘സൈലൻസ് അൺനോൺ കോളേഴ്സ്’ സൗകര്യം പ്രവർത്തനക്ഷമമാക്കുകയും ചെയ്യാം. ഇതിലൂടെ ഫോണിൽ സേവ് ചെയ്തിട്ടില്ലാത്ത നമ്പറുകളിൽനിന്നുള്ള കോളുകൾ നിശ്ശബ്ദമാക്കി വോയ്സ് മെയിലിലേക്ക് അയയ്ക്കാം. കോളിന്റെ വിവരം കോൾപട്ടികയിൽ നിലനിൽക്കും.
ഈ സംവിധാനം നമ്പറിനെ പൂർണമായി ബ്ലോക്ക് ചെയ്യുന്നതിന് തുല്യമല്ല. അതിനാൽ പരിചയമില്ലാത്ത നമ്പറുകളിൽനിന്ന് പ്രധാനപ്പെട്ട കോളുകൾ പ്രതീക്ഷിക്കുന്നവർ ക്രമീകരണം തിരഞ്ഞെടുക്കുമ്പോൾ ഇക്കാര്യം പരിഗണിക്കണം.
ആൻഡ്രോയ്ഡ് ഫോണുകളിലും സംശയാസ്പദമായ കോളുകൾ തിരിച്ചറിയുന്നതിനും തടയുന്നതിനുമുള്ള സൗകര്യങ്ങൾ ലഭ്യമാണ്. ഓരോ ഉപകരണത്തിലെയും ഫോൺ ആപ്പിലും കോൾ ക്രമീകരണങ്ങളിലും ലഭ്യമായ സുരക്ഷാ സംവിധാനങ്ങൾ പരിശോധിച്ച് ഉപയോഗിക്കാം.