കുവൈത്ത് സിറ്റി: റോഡ് അറ്റകുറ്റപ്പണികളുടെ ഭാഗമായി ഹമദ് അൽ സുവൈർ റോഡിലെ രണ്ട് വാഹനപാതകൾ പത്ത് ദിവസത്തേക്ക് അടച്ചിടുമെന്ന് ജനറൽ ട്രാഫിക് ഡിപ്പാർട്ട്‌മെന്റ് അറിയിച്ചു. ഒക്ടോബർ 29 വ്യാഴാഴ്ച പുലർച്ചെ മുതലാണ് ഗതാഗത നിയന്ത്രണം പ്രാബല്യത്തിൽ വരിക.
കിങ് അബ്ദുൽ അസീസ് ബിൻ അബ്ദുറഹ്മാൻ അൽ സൗദ് റോഡുമായുള്ള, അഥവാ റോഡ് നമ്പർ 30ുമായുള്ള കവലയിൽനിന്ന് അഹമ്മദി ഭാഗത്തേക്കുള്ള രണ്ട് പാതകളിലാണ് നിയന്ത്രണം ഏർപ്പെടുത്തുന്നത്. റോഡിൽ ആവശ്യമായ അറ്റകുറ്റപ്പണികൾ നടത്തുന്നതിനാണ് താൽക്കാലിക അടച്ചിടൽ.
ഹമദ് അൽ സുവൈർ റോഡ് പൂർണമായി അടച്ചിടുന്നതിനു പകരം നിർദിഷ്ട ഭാഗത്തെ രണ്ട് പാതകളിലാണ് നിയന്ത്രണം ബാധകമാകുക. അറ്റകുറ്റപ്പണികൾക്കായി പ്രഖ്യാപിച്ച അടച്ചിടൽ കാലയളവ് പത്ത് ദിവസമാണെന്ന് ട്രാഫിക് വിഭാഗം വ്യക്തമാക്കി.