കുവൈത്ത് സിറ്റി: കുവൈത്തിൽ വ്യാഴാഴ്ച ചിതറിയ നേരിയ മഴയ്ക്കും വൈകുന്നേരത്തോടെ മൂടൽമഞ്ഞ് രൂപപ്പെടാനും സാധ്യതയുണ്ടെന്ന് കാലാവസ്ഥാ നിരീക്ഷണ വകുപ്പ്. പകൽ താരതമ്യേന ചൂടും ഈർപ്പവുമുള്ള കാലാവസ്ഥയായിരിക്കും. തീരപ്രദേശങ്ങളിൽ അന്തരീക്ഷ ഈർപ്പം കൂടുതലായിരിക്കുമെന്നും പ്രവചനത്തിൽ വ്യക്തമാക്കുന്നു.
ഭാഗികമായി മേഘാവൃതമോ മേഘാവൃതമോ ആയ അന്തരീക്ഷമാണ് പ്രതീക്ഷിക്കുന്നത്. ഉയർന്ന താപനില 34 ഡിഗ്രി സെൽഷ്യസും കുറഞ്ഞ താപനില 24 ഡിഗ്രി സെൽഷ്യസുമായിരിക്കും. പകൽ കാറ്റ് ദിശമാറിയും തെക്കുകിഴക്കൻ ദിശയിൽനിന്നുമായി മണിക്കൂറിൽ എട്ട് മുതൽ 32 കിലോമീറ്റർ വരെ വേഗത്തിൽ വീശും.
രാത്രിയിൽ മിതമായ താപനിലയും ഈർപ്പവുമുള്ള കാലാവസ്ഥ തുടരും. ചില പ്രദേശങ്ങളിൽ ചിതറിയ മഴയ്ക്കും മൂടൽമഞ്ഞിനും സാധ്യതയുണ്ട്. രാത്രികാല കാറ്റിന്റെ വേഗം മണിക്കൂറിൽ ആറ് മുതൽ 28 കിലോമീറ്റർ വരെയായിരിക്കും. അന്തരീക്ഷ ഈർപ്പം 95 ശതമാനം വരെ ഉയരാനിടയുണ്ടെന്നും പ്രവചിക്കുന്നു.
കടൽ പൊതുവേ ശാന്തമോ മിതമായ തിരമാലകളോടുകൂടിയതോ ആയിരിക്കും. പകൽ തിരമാലകളുടെ ഉയരം ഒന്ന് മുതൽ നാല് അടി വരെയും രാത്രിയിൽ ഒന്ന് മുതൽ മൂന്ന് അടി വരെയും പ്രതീക്ഷിക്കുന്നു. മഴയും മൂടൽമഞ്ഞും മൂലം കാഴ്ചപരിധി കുറയാനിടയുള്ളതിനാൽ വാഹനമോടിക്കുന്നവർ വേഗം നിയന്ത്രിക്കുകയും വാഹനങ്ങൾക്കിടയിൽ മതിയായ സുരക്ഷാ അകലം പാലിക്കുകയും വേണം.