ദോഹ: ആഗോള ഉപഭോക്താക്കൾക്കുള്ള വിതരണം ഉറപ്പാക്കാനും വാതകവിതരണ സ്രോതസ്സുകൾ വൈവിധ്യവത്കരിക്കാനും അമേരിക്കൻ ദ്രവീകൃത പ്രകൃതിവാതകത്തിന്റെ ദീർഘകാല വാങ്ങൽ വിപുലപ്പെടുത്തി ഖത്തർ എനർജി. വുഡ്‌സൈഡ് എനർജിയുമായും ഷെനിയർ എനർജിയുമായുമുള്ള കരാറുകളിലൂടെ പ്രതിവർഷം ആകെ 70 ലക്ഷം ടൺ വരെ എൽഎൻജി ലഭ്യമാക്കാനാണ് പദ്ധതി.
വുഡ്‌സൈഡുമായുള്ള 20 വർഷത്തെ കരാർ പ്രകാരം അമേരിക്കയിലെ ലൂസിയാന എൽഎൻജി പദ്ധതിയിൽനിന്ന് പ്രതിവർഷം 30 ലക്ഷം ടൺ വാതകം വാങ്ങും. ഈ കരാറിലെ വിതരണം 2030ൽ ആരംഭിക്കുമെന്നാണ് പ്രതീക്ഷിക്കുന്നത്.
നേരത്തേ ഷെനിയറുമായി ഒപ്പുവച്ച രണ്ട് കരാറുകളിലൂടെ പ്രതിവർഷം 40 ലക്ഷം ടൺ വരെ എൽഎൻജി വാങ്ങാനും ധാരണയായി. സബീൻ പാസ്, കോർപ്പസ് ക്രിസ്റ്റി പദ്ധതികളിൽനിന്നുള്ള വിതരണം 2030കളുടെ തുടക്കത്തിൽ ആരംഭിച്ച് 2054 വരെ തുടരും. ഇതിൽ ഒരു ദശലക്ഷം ടണ്ണിന്റെ വിതരണം സബീൻ പാസ് വിപുലീകരണ പദ്ധതിയുടെ അന്തിമ നിക്ഷേപ തീരുമാനമടക്കമുള്ള വ്യവസ്ഥകൾക്ക് വിധേയമാണ്.
ഹോർമുസ് കടലിടുക്കിലെ കപ്പൽഗതാഗതം നേരിടുന്ന അപകടസാധ്യതകൾക്കിടെ ഗൾഫിനു പുറത്തുനിന്നുള്ള വിതരണം വർധിപ്പിക്കുന്നത് ഖത്തർ എനർജിയുടെ വ്യാപാരശേഷിക്ക് പിന്തുണയാകും. പുതിയ കരാറുകൾ ഭാവിയിലെ വിതരണത്തിനുള്ളതായതിനാൽ നിലവിലെ തടസ്സങ്ങൾക്ക് ഉടനടി പരിഹാരമാകില്ല.