ന്യൂഡൽഹി: ഇന്ത്യയിലെ ഓൺലൈൻ യാത്രാ സേവന വിപണിയിൽ വൻ മുന്നേറ്റവുമായി റാപിഡോ. രാജ്യത്ത് പ്രതിമാസം ആപ്പ് ഉപയോഗിക്കുന്നവരുടെ എണ്ണത്തിൽ യൂബറിനെക്കാൾ ഇരട്ടിയിലധികം ഉപയോക്താക്കളെ സ്വന്തമാക്കി റാപിഡോ ഒന്നാമതെത്തിയതായി സെൻസർ ടവറിന്റെ കണക്കുകൾ വ്യക്തമാക്കുന്നു.
സെപ്റ്റംബർ 28 മുതൽ ഒക്ടോബർ 27 വരെയുള്ള 30 ദിവസത്തെ കണക്കനുസരിച്ച് റാപിഡോയ്ക്ക് 9.4 കോടി പ്രതിമാസ സജീവ ഉപയോക്താക്കളുണ്ട്. യൂബറിന് നാല് കോടിയും ഒലയ്ക്ക് 2.2 കോടിയുമാണ് ഉപയോക്താക്കൾ.
ഈ വർഷത്തിന്റെ തുടക്കവുമായി താരതമ്യം ചെയ്യുമ്പോൾ റാപിഡോയുടെ ഉപയോക്താക്കളുടെ എണ്ണത്തിൽ 27 ശതമാനം വർധനവുണ്ടായി. ജനുവരി ഒന്നുമുതൽ ഫെബ്രുവരി 28 വരെയുള്ള കാലയളവിൽ ഏകദേശം 7.4 കോടി ഉപയോക്താക്കളായിരുന്നു റാപിഡോയ്ക്ക് ഉണ്ടായിരുന്നത്. യൂബറിന്റെ ഉപയോക്താക്കളുടെ എണ്ണം 3.9 കോടിയിൽനിന്ന് നാല് കോടിയായി നേരിയ തോതിൽ വർധിച്ചു. അതേസമയം, ഒലയുടെ ഉപയോക്താക്കളുടെ എണ്ണത്തിൽ 21 ശതമാനം ഇടിവുണ്ടായി. 2.8 കോടിയിൽനിന്ന് 2.2 കോടിയായാണ് കുറഞ്ഞത്.
യൂബറിനെയും ഒലയെയും മറികടന്ന് റാപിഡോ
റാപിഡോയുടെ 9.4 കോടി ഉപയോക്താക്കൾ യൂബറിന്റെയും ഒലയുടെയും ആകെ ഉപയോക്താക്കളായ 6.2 കോടിയേക്കാൾ കൂടുതലാണ്. മൂന്ന് പ്ലാറ്റ്‌ഫോമുകളുടെയും ആകെ ഉപയോക്താക്കളിൽ ഏകദേശം 60 ശതമാനവും റാപിഡോയുടേതാണെന്നാണ് കണക്കുകൾ സൂചിപ്പിക്കുന്നത്. വർഷത്തിന്റെ തുടക്കത്തിൽ ഇത് 52 ശതമാനമായിരുന്നു.
ബൈക്ക് ടാക്സിയിൽനിന്ന് ക്യാബ് സേവനങ്ങളിലേക്ക്
2015-ൽ ബൈക്ക് ടാക്സി സേവനമായാണ് റാപിഡോ പ്രവർത്തനം ആരംഭിച്ചത്. തിരക്കേറിയ നഗരങ്ങളിൽ കുറഞ്ഞ ചെലവിൽ യാത്ര ചെയ്യാനുള്ള സൗകര്യം ഒരുക്കിയ കമ്പനി പിന്നീട് ഓട്ടോറിക്ഷ, കാർ ടാക്സി തുടങ്ങിയ സേവനങ്ങളിലേക്കും പ്രവർത്തനം വ്യാപിപ്പിച്ചു. ചെറുനഗരങ്ങളിലേക്കുള്ള സാന്നിധ്യവും വർധിപ്പിച്ചു.
2024 ജനുവരിയിൽ തന്നെ ആൻഡ്രോയിഡ് പ്ലാറ്റ്‌ഫോമിലെ പ്രതിമാസ ഉപയോക്താക്കളുടെ എണ്ണത്തിൽ റാപിഡോ യൂബറിനെ മറികടന്നിരുന്നു. 2025 ജൂലൈയോടെ റാപിഡോയ്ക്ക് ഏകദേശം അഞ്ച് കോടി ഉപയോക്താക്കളുണ്ടായിരുന്നപ്പോൾ യൂബറിന് മൂന്ന് കോടിയായിരുന്നു.
ഒലയുടെ ഉപയോക്താക്കളിൽ ഇടിവ്
ഒരു കാലത്ത് ഇന്ത്യയിലെ ഓൺലൈൻ ടാക്സി സേവനരംഗത്ത് മുൻനിരയിലുണ്ടായിരുന്ന ഒലയുടെ ഉപയോക്താക്കളുടെ എണ്ണത്തിൽ തുടർച്ചയായ കുറവാണ് രേഖപ്പെടുത്തുന്നത്. 2026-ൽ ഇതുവരെ 21 ശതമാനം ഇടിവാണ് ഉണ്ടായത്. അതേസമയം, യൂബറിന്റെ ഉപയോക്തൃ അടിത്തറയിൽ വലിയ മാറ്റമില്ലാതെ തുടരുകയാണ്.
റാപിഡോയുടെ വളർച്ചയ്ക്ക് പിന്നിൽ കുറഞ്ഞ നിരക്കിലുള്ള യാത്രാസേവനങ്ങളും ബൈക്ക്, ഓട്ടോ യാത്രകൾക്കുള്ള വർധിച്ച ആവശ്യകതയും പ്രധാന ഘടകങ്ങളാണെന്നാണ് വിലയിരുത്തൽ.
എന്നാൽ പ്രതിമാസ സജീവ ഉപയോക്താക്കളുടെ എണ്ണം മാത്രം കമ്പനികളുടെ വരുമാനമോ ലാഭമോ വ്യക്തമാക്കുന്നില്ലെന്ന് റിപ്പോർട്ട് ചൂണ്ടിക്കാട്ടുന്നു. ആപ്പ് തുറന്ന് ഉപയോഗിച്ചവരുടെ എണ്ണമാണ് ഈ കണക്കിൽ ഉൾപ്പെടുന്നത്; യാത്ര ബുക്ക് ചെയ്തവരുടെ എണ്ണമല്ല. സെൻസർ ടവറിന്റെ കണക്കുകൾ വിലയിരുത്തലുകളാണ്, കമ്പനികൾ ഓഡിറ്റ് ചെയ്ത് പുറത്തുവിട്ട ഔദ്യോഗിക കണക്കുകളല്ല.
ഉപയോക്താക്കളുടെ എണ്ണത്തിലെ ഈ മുന്നേറ്റം വരുമാനത്തിലും ലാഭത്തിലും എത്രത്തോളം പ്രതിഫലിക്കുമെന്നതാണ് ഇനി റാപിഡോ നേരിടുന്ന പ്രധാന വെല്ലുവിളി.