കുവൈത്ത് സിറ്റി: ആരോഗ്യ മന്ത്രാലയ അണ്ടർ സെക്രട്ടറി ഷെയ്ഖ് ഡോ. സൽമാൻ ഖലീഫ അൽ സബാഹ് മെഡിക്കൽ എമർജൻസി ഓപ്പറേഷൻസ് റൂമിലും മെഡിക്കൽ സംഭരണകേന്ദ്രങ്ങളിലും സന്ദർശനം നടത്തി. വൈകുന്നേരം നടത്തിയ പരിശോധനയിൽ പ്രവർത്തനങ്ങളുടെ പുരോഗതിയും ഡ്യൂട്ടിയിലുള്ള സംഘങ്ങൾ തമ്മിലുള്ള ഏകോപനവും അദ്ദേഹം വിലയിരുത്തി.
അടിയന്തര ചികിത്സാ സേവനങ്ങളുടെ പ്രവർത്തനരീതിയും ബന്ധപ്പെട്ട വിഭാഗങ്ങൾ തമ്മിലുള്ള സഹകരണവും സന്ദർശനത്തിന്റെ ഭാഗമായി പരിശോധിച്ചു. ഡ്യൂട്ടിയിലുള്ള ഉദ്യോഗസ്ഥരുമായി കൂടിക്കാഴ്ച നടത്തിയ അദ്ദേഹം അവരുടെ പ്രവർത്തനങ്ങളെ അഭിനന്ദിക്കുകയും ചുമതലകൾ നിർവഹിക്കുന്നതിലുള്ള ശ്രമങ്ങളെ വിലമതിക്കുകയും ചെയ്തു.
ആരോഗ്യസേവനങ്ങൾ തടസ്സമില്ലാതെ തുടരുന്നതിന് വിവിധ സംഘങ്ങളും ബന്ധപ്പെട്ട വിഭാഗങ്ങളും തമ്മിൽ സ്ഥിരമായ ഏകോപനം വേണമെന്ന് അദ്ദേഹം നിർദേശിച്ചു. പ്രവർത്തനങ്ങൾ സുഗമമായി മുന്നോട്ടുകൊണ്ടുപോകുന്നതിനും സേവനങ്ങളുടെ തുടർച്ച ഉറപ്പാക്കുന്നതിനും കൂട്ടായ പ്രവർത്തനം പ്രധാനമാണെന്നും വ്യക്തമാക്കി.
മെഡിക്കൽ സംഭരണകേന്ദ്രങ്ങളിലെ പ്രവർത്തനങ്ങളും സന്ദർശനത്തിന്റെ ഭാഗമായി വിലയിരുത്തി. ആരോഗ്യ സംവിധാനത്തിലെ വിവിധ വിഭാഗങ്ങളുടെ പ്രവർത്തനം നേരിട്ട് മനസ്സിലാക്കുന്നതിനും ഡ്യൂട്ടി സംഘങ്ങളുടെ ഏകോപനം പരിശോധിക്കുന്നതിനുമായിരുന്നു സന്ദർശനം.