പതിനാറോളം പ്രമുഖ ക്ലബ്ബുകൾ മാറ്റുരയ്ക്കും; കാൽപ്പന്തുകളിയുടെ ആവേശമാമാങ്കത്തിന് അഹമ്മദി വേദിയാകും
കുവൈറ്റ്: കുവൈറ്റിലെ പ്രവാസി കായികലോകത്ത് ആവേശത്തിന്റെ പുതിയ അധ്യായം കുറിച്ചുകൊണ്ട് കെൻസ് സിൽവർ സ്റ്റാർസ് സ്പോർട്ടിങ് ക്ലബ്ബിന്റെ നേതൃത്വത്തിൽ സംഘടിപ്പിക്കുന്ന ഏഷ്യൻ സോക്കർ ഫെസ്റ്റ് 2026-27 നവംബർ 6 വെള്ളിയാഴ്ച അഹമ്മദി അറീനയിൽ അരങ്ങേറും. മേഖലയിലെ പതിനാറോളം പ്രമുഖ ക്ലബ്ബുകൾ മാറ്റുരയ്ക്കുന്ന ഫുട്ബോൾ മാമാങ്കത്തിൽ ആകർഷകമായ സമ്മാനങ്ങളാണ് വിജയികളെ കാത്തിരിക്കുന്നത്.
കുവൈറ്റിലെ ഇന്ത്യൻ പ്രവാസി സമൂഹത്തിന് മറക്കാനാവാത്ത കായികാനുഭവം സമ്മാനിക്കുക എന്ന ലക്ഷ്യത്തോടെ സംഘടിപ്പിക്കുന്ന ടൂർണമെന്റിൽ വാശിയേറിയ മത്സരങ്ങൾക്കൊപ്പം സൗഹൃദത്തിന്റെയും കായികമനോഭാവത്തിന്റെയും സന്ദേശവും ഉയർത്തിപ്പിടിക്കും. വൈകിട്ട് 3.30ന് ആരംഭിക്കുന്ന മത്സരങ്ങൾ രാത്രി 10 മണിയോടെ നടക്കുന്ന സമ്മാനദാന ചടങ്ങോടെ സമാപിക്കും.
കുവൈറ്റിലെ ഫുട്ബോൾ പ്രേമികൾക്ക് ആവേശകരമായ മത്സരങ്ങൾ നേരിൽ ആസ്വദിക്കാനുള്ള അവസരമാണ് സംഘാടകർ ഒരുക്കുന്നത്. ഏഷ്യൻ രാജ്യങ്ങളിൽ നിന്നുള്ള താരങ്ങൾ അണിനിരക്കുന്ന ടൂർണമെന്റിൽ മികച്ച ടീമുകൾ തമ്മിലുള്ള പോരാട്ടം കായികപ്രേമികൾക്ക് ആവേശകരമായ അനുഭവമാകുമെന്നാണ് പ്രതീക്ഷ.
കെൻസ് പ്രൊമോട്ടേഴ്സ് മുഖ്യ സ്പോൺസറായും അസ്‌ദൂരിയൻ ജ്വല്ലറിയും മുഹമ്മദ് അൽ ഖത്തൻ സോഫ്റ്റ്‌വെയർ കമ്പനിയും സപ്പോർട്ടിങ് സ്പോൺസർമാരായും ടൂർണമെന്റിന് പിന്തുണ നൽകുന്നു.
കുവൈറ്റിലെ പ്രവാസി കായികരംഗത്ത് ശ്രദ്ധേയമായ സ്ഥാനം ഉറപ്പിക്കുന്ന ഏഷ്യൻ സോക്കർ ഫെസ്റ്റിലേക്ക് എല്ലാ കായികപ്രേമികളെയും കെൻസ് സിൽവർ സ്റ്റാർസ് സ്പോർട്ടിങ് ക്ലബ് ഹൃദയപൂർവം സ്വാഗതം ചെയ്തു.
സംഘാടകർ: കെൻസ് സിൽവർ സ്റ്റാർസ് സ്പോർട്ടിങ് ക്ലബ്, കുവൈറ്റ്.