ബെംഗളൂരു: പ്രണയബന്ധത്തെത്തുടർന്നുണ്ടായ തർക്കത്തെത്തുടർന്ന് ബെംഗളൂരുവിൽ ഇരുപത്തിരണ്ടുകാരനായ മലയാളി യുവാവ് കൊല്ലപ്പെട്ടു. പാലക്കാട് സ്വദേശി കിരൺ (22) ആണ് ക്രൂരമർദ്ദനത്തിനിരയായി കൊല്ലപ്പെട്ടത്. സംഭവത്തിൽ കിരണിന്റെ തൊഴിലുടമയും പെൺകുട്ടിയുടെ പിതാവുമായ യെലഹങ്ക സ്വദേശി ആനന്ദിനെ ബെംഗളൂരു പൊലീസ് അറസ്റ്റ് ചെയ്തു.
സ്വീറ്റ് കോൺ നിർമ്മാണ യൂണിറ്റ് നടത്തിവരുന്നയാളാണ് പിടിയിലായ ആനന്ദ്. ഇവിടെ കഴിഞ്ഞ രണ്ട് വർഷമായി ജോലി ചെയ്തുവരികയായിരുന്നു കിരൺ. ഈ തൊഴിലിടവുമായുള്ള ബന്ധത്തിനിടയിലാണ് ആനന്ദിന്റെ മകളായ പത്തൊൻപതുകാരിയുമായി കിരൺ പ്രണയത്തിലാകുന്നത്. മൈസൂരുവിൽ പഠനം നടത്തിവരുന്ന പെൺകുട്ടി കുറച്ചുദിവസങ്ങൾക്ക് മുമ്പ് അവധിക്കായി നാട്ടിൽ എത്തിയിരുന്നു.
സംഭവദിവസം രാവിലെ ആനന്ദും ഭാര്യയും തമിഴ്‌നാട്ടിലേക്ക് യാത്രപോയിരുന്നു. ഇത് മനസ്സിലാക്കിയ കിരൺ പെൺകുട്ടിയെ കാണുന്നതിനായി ആനന്ദിന്റെ വീട്ടിലെത്തുകയായിരുന്നു. എന്നാൽ, യാത്രാമധ്യേ അപ്രതീക്ഷിതമായി ആനന്ദ് തിരികെ വീട്ടിലെത്തുകയും മകളെയും കിരണിനെയും വീടിനുള്ളിൽ ഒരുമിച്ച് കണ്ടെത്തുകയും ചെയ്തു.
ഇത് കടുത്ത പ്രകോപനത്തിന് കാരണമാവുകയായിരുന്നു.
തുടർന്ന് മകളെ മറ്റൊരു ബന്ധുവീട്ടിലേക്ക് മാറ്റിയ ശേഷം ആനന്ദ് കിരണിനെ ചോദ്യം ചെയ്യുകയും ബാറ്റ്, പൈപ്പ് തുടങ്ങിയ ആയുധങ്ങൾ ഉപയോഗിച്ച് ക്രൂരമായി മർദ്ദിക്കുകയുമായിരുന്നു. മർദ്ദനത്തിനിടയിൽ അടിവയറ്റിൽ ശക്തമായ ചവിട്ടേറ്റ കിരൺ കുഴഞ്ഞുവീണു.
യുവാവ് അവശനിലയിലായതോടെ പ്രതിയായ ആനന്ദ് തന്നെയാണ് ഇയാളെ ഓട്ടോറിക്ഷയിൽ കയറ്റി ആശുപത്രിയിലേക്ക് അയച്ചത്. എന്നാൽ ആശുപത്രിയിൽ എത്തിച്ചപ്പോഴേക്കും കിരണിന്റെ മരണം സംഭവിച്ചിരുന്നതായി ഡോക്ടർമാർ സ്ഥിരീകരിച്ചു.
ബെംഗളൂരുവിൽ പച്ചക്കറി കടയിൽ ഡ്രൈവറായി ജോലി ചെയ്യുന്ന കിരണിന്റെ സഹോദരനൊപ്പമായിരുന്നു കിരൺ താമസിച്ചിരുന്നത്. വിവരമറിഞ്ഞ് സ്ഥലത്തെത്തിയ പൊലീസ് പ്രതിയായ ആനന്ദിന്റെ അറസ്റ്റ് രേഖപ്പെടുത്തുകയും തുടർന്നുള്ള അന്വേഷണം ഊർജിതമാക്കുകയും ചെയ്തിട്ടുണ്ട്. ആശുപത്രി മോർച്ചറിയിൽ സൂക്ഷിച്ചിരിക്കുന്ന മൃതദേഹം പോസ്റ്റ്‌മോർട്ടം നടപടികൾക്ക് ശേഷം ബന്ധുക്കൾക്ക് വിട്ടുനൽകും.