ചെന്നൈ: തമിഴ് സിനിമയിലെ എവർഗ്രീൻ കോമ്പോയായ സംഗീതജ്ഞൻ ഇളയരാജയും മുതിർന്ന നടൻ രാമരാജനും വീണ്ടും ഒന്നിക്കുന്ന പുതിയ ചിത്രം 'കടവുൾ തന്ത പരിശ്' ഗാനരചനയിൽ അപൂർവ്വ നേട്ടത്തിന് സാക്ഷ്യം വഹിക്കുന്നു. നവാഗതനായ കാശിമായൻ സംവിധാനം ചെയ്യുന്ന ഈ ചിത്രത്തിനായി ഒരൊറ്റ ദിവസം കൊണ്ട് ആറ് ഗാനങ്ങളാണ് ഇളയരാജ ചിട്ടപ്പെടുത്തിയത്. അടുത്ത ഏതാനും ദിവസങ്ങൾക്കുള്ളിൽ തന്നെ ഇവയുടെ റെക്കോർഡിംഗും പൂർത്തിയാക്കി. ഇളയരാജയെ നേരിൽ കണ്ട് നന്ദി അറിയിച്ച ശേഷമാണ് രാമരാജൻ ഈ അപൂർവ്വ നേട്ടം സോഷ്യൽ മീഡിയയിലൂടെ പങ്കുവെച്ചത്. "എന്റെ ചിത്രത്തിന് വേണ്ടി ഒരൊറ്റ ദിവസം കൊണ്ട് ആറ് മനോഹരമായ ഗാനങ്ങൾ ഈണം നൽകി, ദിവസങ്ങൾക്കുള്ളിൽ റെക്കോർഡിംഗും പൂർത്തിയാക്കി തന്ന സംഗീത ദൈവവും എന്റെ ജ്യേഷ്ഠനുമായ ഇളയരാജയ്ക്ക് ഹൃദയം നിറഞ്ഞ നന്ദി. എന്റെ ജ്യേഷ്ഠനോട് ഞാൻ എന്നും കടപ്പെട്ടിരിക്കും," എന്ന് രാമരാജൻ കുറിച്ചു. സംവിധായകൻ കാശിമായൻ, സംഭാഷണ രചയിതാവ് രാജഗോപാൽ, പ്രൊഡക്ഷൻ എക്സിക്യൂട്ടീവ് റാം പ്രഭു എന്നിവരും രാമരാജനൊപ്പം ഇളയരാജയെ കാണാനെത്തിയിരുന്നു. രാമരാജനും ഇളയരാജയും ഒന്നിക്കുന്ന 25-ാമത് ചിത്രം എന്ന പ്രത്യേകതയും 'കടവുൾ തന്ത പരിശ്' എന്ന സിനിമയ്ക്കുണ്ട്. 'എങ്ക ഊരു പാട്ടുകാരൻ', 'ശെൺബകമേ ശെൺബകമേ', 'കരകാട്ടക്കാരൻ', 'ഊരു വിട്ടു ഊരു വന്തു' തുടങ്ങി തമിഴ് ഗ്രാമീണ സിനിമകളുടെ ചരിത്രം തിരുത്തിയെഴുതിയ നിരവധി ഹിറ്റുകളാണ് ഈ സഖ്യത്തിൽ പിറന്നിട്ടുള്ളത്. നീണ്ട ഇടവേളയ്ക്ക് ശേഷം സെന്തിൽ, കോവൈ സരള എന്നിവരും രാമരാജനൊപ്പം ഈ ചിത്രത്തിൽ പ്രധാന കോമഡി വേഷങ്ങളിൽ ഒപ്പുവെക്കുന്നുണ്ട്. ചിത്രീകരണത്തിന് മുന്നോടിയായി തന്നെ സംഗീതമൊരുക്കൽ പൂർത്തിയായതോടെ ആരാധകരും വലിയ ആവേശത്തിലാണ്.
ഒരൊറ്റ ദിവസം കൊണ്ട് ആറ് ഗാനങ്ങൾ ചിട്ടപ്പെടുത്തി ഇളയരാജ; ജ്യേഷ്ഠനോട് എന്നും കടപ്പെട്ടിരിക്കുമെന്ന് രാമരാജൻ
