ഹൈദരാബാദ്: പ്രമുഖ ഇന്ത്യൻ കൺസോൾ ഗെയിമിംഗ് സ്റ്റുഡിയോയായ 'ഷർട്ട്ഗൺ ഗെയിംസിൽ' (Shortgun Games) തെലുങ്ക് സൂപ്പർതാരം മഹേഷ് ബാബു നിക്ഷേപം നടത്തി.
മുംബൈ ആസ്ഥാനമായി പ്രവർത്തിക്കുന്ന ഈ ഗെയിമിംഗ് സ്റ്റുഡിയോയിൽ അദ്ദേഹം ഔദ്യോഗികമായി ഒരു മൈനോറിറ്റി ഓഹരിയാണ് സ്വന്തമാക്കിയത്. സിനിമാമേഖലയ്ക്ക് പുറത്തേക്ക് തന്റെ നിക്ഷേപ വ്യാപ്തി വർദ്ധിപ്പിക്കുന്നതിന്റെ ഭാഗമായാണ് താരത്തിന്റെ ഈ പുതിയ ചുവടുവെപ്പ്.
ഇന്ത്യൻ ഗെയിമിംഗ് മേഖലയിൽ അന്താരാഷ്ട്ര നിലവാരമുള്ള കൺസോൾ, പിസി (PC) ഗെയിമുകൾ നിർമ്മിക്കുക എന്ന ലക്ഷ്യത്തോടെയാണ് ഷർട്ട്ഗൺ ഗെയിംസ് പ്രവർത്തിക്കുന്നത്. കമ്പനിയുടെ ഫ്ലാഗ്ഷിപ്പ് പ്രോജക്റ്റായ 'പ്രൊജക്റ്റ് ടേക്ക്ഡൗൺ' (Project Takedown) ഉൾപ്പെടെയുള്ള ഒറിജിനൽ ഗെയിമിംഗ് ആശയങ്ങളുടെ വികസനത്തിൽ മഹേഷ് ബാബു സജീവമായി പങ്കാളിയാകുമെന്നാണ് വിവരം. പ്ലേസ്റ്റേഷൻ 5 (PlayStation 5), എക്സ്ബോക്സ് (Xbox Series X|S) എന്നിവയ്ക്കൊപ്പം പിസി പ്ലാറ്റ്‌ഫോമുകളിലും കളിക്കാൻ സാധിക്കുന്ന തരത്തിലുള്ള വലിയ ഗെയിമുകളാണ് സ്റ്റുഡിയോ വികസിപ്പിച്ചു കൊണ്ടിരിക്കുന്നത്.
സാധാരണയായി മൊബൈൽ ഗെയിമുകൾക്ക് പ്രാധാന്യം ലഭിക്കുന്ന ഇന്ത്യൻ വിപണിയിൽ നിന്ന് വ്യത്യസ്തമായി, ആഗോളതലത്തിൽ ശ്രദ്ധിക്കപ്പെടുന്ന പ്രീമിയം കൺസോൾ ഗെയിമുകൾ നിർമ്മിക്കുകയാണ് കമ്പനിയുടെ ലക്ഷ്യം.
യുഎസ്, യൂറോപ്പ്, ജപ്പാൻ തുടങ്ങിയ അന്താരാഷ്ട്ര വിപണികൾ ലക്ഷ്യമിടുന്ന ഈ ഗെയിമുകളുടെ നിർമ്മാണത്തിന് താരത്തിന്റെ സാന്നിധ്യം വലിയ കരുത്തുപകരുമെന്നാണ് വിലയിരുത്തപ്പെടുന്നത്.
2022-ൽ സ്ഥാപിതമായ ഷർട്ട്ഗൺ ഗെയിംസ് ഇതിനകം തന്നെ നിക്ഷേപകരിൽ നിന്ന് വലിയ പിന്തുണ നേടി മുന്നേറുകയാണ്.
മഹേഷ് ബാബുവിന്റെ പുതിയ നിക്ഷേപത്തിലൂടെ ഇന്ത്യൻ ഗെയിമിംഗ് രംഗം കൂടുതൽ ആഗോള ശ്രദ്ധയാകർഷിക്കുമെന്നാണ് പ്രതീക്ഷിക്കുന്നത്.