വാഷിങ്ടൺ: അമേരിക്കൻ ഇടക്കാല തെരഞ്ഞെടുപ്പിൽ റിപ്പബ്ലിക്കൻ പാർട്ടിക്കേറ്റ കനത്ത തിരിച്ചടിക്ക് പ്രധാന കാരണം ഇറാനുമായുള്ള യുദ്ധമാണെന്ന് വൈസ് പ്രസിഡന്റ് ജെ.ഡി. വാൻസ്. തെരഞ്ഞെടുപ്പ് ഫലത്തിനു പിന്നാലെ സമൂഹമാധ്യമമായ എക്‌സിൽ നടത്തിയ പ്രതികരണത്തിലാണ് ഭരണകൂടത്തിന്റെ യുദ്ധനയവും പാർട്ടിയുടെ പരാജയവും തമ്മിലുള്ള ബന്ധം അദ്ദേഹം തുറന്നുപറഞ്ഞത്.
“ഞങ്ങൾ പരാജയപ്പെട്ടതിന് കാരണം യുദ്ധമാണ്. പ്രസിഡന്റ് തന്നെയും കഴിഞ്ഞ രാത്രി ഇക്കാര്യം പറഞ്ഞു” എന്ന് വാൻസ് വ്യക്തമാക്കി. പരാജയത്തിന്റെ കാരണം അംഗീകരിച്ചുകൊണ്ടുവേണം പാർട്ടിയുടെ മുന്നോട്ടുള്ള പ്രവർത്തനങ്ങളെക്കുറിച്ചുള്ള സത്യസന്ധമായ ചർച്ച ആരംഭിക്കേണ്ടതെന്നും അദ്ദേഹം ചൂണ്ടിക്കാട്ടി.
വോട്ടർമാർ പോളിങ് കേന്ദ്രങ്ങളിൽ എത്താതിരുന്നതാണ് പ്രധാന പ്രശ്‌നമെന്ന വിശദീകരണത്തെ വാൻസ് തള്ളി. 2024ൽ ട്രംപ്–വാൻസ് സഖ്യത്തെ പിന്തുണച്ച നിരവധി പേർ ഇത്തവണ ഡെമോക്രാറ്റിക് സ്ഥാനാർഥികൾക്ക് വോട്ട് ചെയ്തെന്നാണ് അദ്ദേഹത്തിന്റെ വിലയിരുത്തൽ.
യുദ്ധം അവസാനിപ്പിക്കുക, ജീവിതച്ചെലവും പണപ്പെരുപ്പവും നിയന്ത്രിക്കുന്നതിൽ ശ്രദ്ധ കേന്ദ്രീകരിക്കുക, അമേരിക്കയുടെ താൽപര്യങ്ങൾക്ക് മുൻഗണന നൽകുക, ഇസ്രയേലുമായുള്ള ബന്ധത്തിൽ മാറ്റം വരുത്തുക എന്നിവയാണ് പിന്തുണ പിൻവലിച്ച വോട്ടർമാർ ഉന്നയിച്ച പ്രധാന ആവശ്യങ്ങളെന്ന് വാൻസ് പറഞ്ഞു. താൻ ആശയവിനിമയം നടത്തിയ അഭിപ്രായസർവേ വിദഗ്ധന്റെ കണ്ടെത്തലുകൾ ചൂണ്ടിക്കാട്ടിയായിരുന്നു വിശദീകരണം.