അണുബാധയുൾപ്പെടെ പല കാരണങ്ങളാൽ ശരീരതാപനില ഉയരാം. പനി കുറയ്ക്കാൻ വീട്ടിൽ പരീക്ഷിക്കുന്ന ചില മാർഗങ്ങൾക്ക് ഫലപ്രാപ്തി തെളിയിച്ചിട്ടില്ല. മറ്റു ചിലത് ചർമത്തിന് ക്ഷതമോ മരുന്നിന്റെ അമിതഡോസോ ഉണ്ടാക്കാം. ലബനീസ് ദിനപത്രമായ അന്നഹാർ ചൂണ്ടിക്കാട്ടിയ ഏഴ് പിഴവുകൾ ഇവയാണ്.
1. ശരീരത്തിൽ ആൽക്കഹോൾ തേക്കുക. ചർമത്തിലൂടെയോ ശ്വസനത്തിലൂടെയോ ആൽക്കഹോൾ ശരീരത്തിൽ പ്രവേശിച്ച് വിഷബാധയ്ക്കിടയാക്കാം.
2. സോക്‌സിനുള്ളിൽ ഉള്ളിയോ ഉരുളക്കിഴങ്ങോ വയ്ക്കുക. ഈ രീതി പനി കുറയ്ക്കുമെന്നതിന് ശാസ്ത്രീയ തെളിവില്ല.
3. പച്ചവെളുത്തുള്ളി കാൽപ്പാദത്തിൽ വയ്ക്കുക. നേരിട്ട് ചർമത്തിൽ ദീർഘനേരം വെച്ചാൽ പൊള്ളലുണ്ടാകാം.
4. സാന്ദ്രമായ വിനാഗിരി ഉപയോഗിച്ച് ശരീരം തുടയ്ക്കുക. ഇത് ചർമത്തിൽ ചുവപ്പും അസ്വസ്ഥതയും ഉണ്ടാക്കാം.
5. ഐസ് വെള്ളത്തിൽ കുളിക്കുക. കടുത്ത തണുപ്പ് വിറയലുണ്ടാക്കുകയും അസ്വസ്ഥത കൂട്ടുകയും ചെയ്യാം.
6. വിയർപ്പിക്കാൻ കട്ടിയുള്ള പുതപ്പുകൾ ഉപയോഗിക്കുക. അമിതമായി പുതയ്ക്കുന്നത് ശരീരത്തിലെ ചൂട് പുറത്തുപോകുന്നത് തടയാം.
7. മരുന്നിലെ ചേരുവകൾ പരിശോധിക്കാതെ ഒന്നിലധികം മരുന്നുകൾ കഴിക്കുക. പനിക്കുള്ള ഗുളികയിലും ജലദോഷത്തിനുള്ള മരുന്നിലും പാരസെറ്റമോൾ ഉണ്ടെങ്കിൽ, രണ്ടും ഒരുമിച്ച് കഴിക്കുന്നത് അമിതഡോസിനും കരളിന് ക്ഷതത്തിനും കാരണമാകാം.
വിശ്രമം, ആവശ്യത്തിന് ദ്രാവകങ്ങൾ കുടിക്കൽ, താപനിലയും മറ്റു ലക്ഷണങ്ങളും നിരീക്ഷിക്കൽ എന്നിവയാണ് വീട്ടിലെ പരിചരണത്തിൽ പ്രധാനം. മൂന്നുമാസത്തിൽ താഴെയുള്ള കുഞ്ഞിന് 38 ഡിഗ്രി സെൽഷ്യസോ അതിലധികമോ പനിയുണ്ടെങ്കിൽ ഉടൻ വൈദ്യോപദേശം തേടണം. പനിയോടൊപ്പം ശ്വാസതടസ്സമോ ആദ്യമായി അപസ്മാരസദൃശമായ വിറയലോ ഉണ്ടായാൽ അടിയന്തര വൈദ്യസഹായം തേടണം.