ഹൈദരാബാദ്: ട്രാൻസ്‌ജെൻഡർ വിഭാഗത്തിൽപ്പെട്ടവർക്കും വ്യത്യസ്ത ലിംഗസ്വത്വമുള്ള തടവുകാർക്കും മാന്യവും സുരക്ഷിതവുമായ താമസസൗകര്യം ഉറപ്പാക്കുന്നതിനായി ഹൈദരാബാദ് സെൻട്രൽ ജയിലിൽ പ്രത്യേക ജെൻഡർ ന്യൂട്രൽ സെൽ ആരംഭിച്ചു. ദേശീയ മനുഷ്യാവകാശ കമ്മീഷന്റെ (NHRC) ഇടപെടലിനെ തുടർന്നാണ് നടപടി.
ജയിലിൽ പ്രത്യേക സെൽ സ്ഥാപിച്ചതായി അധികൃതർ ദേശീയ മനുഷ്യാവകാശ കമ്മീഷനെ അറിയിച്ചു. ഒക്ടോബർ എട്ടിന് കമ്മീഷന്റെ ട്രാൻസ്‌ജെൻഡർ, എൽജിബിടിക്യു+ അവകാശങ്ങൾക്കായുള്ള പ്രത്യേക മോണിറ്റർ ജയിൽ സന്ദർശിച്ചിരുന്നു. ഇതിന് പിന്നാലെയാണ് പുതിയ സൗകര്യം ഒരുക്കിയത്.
സ്വത്വത്തിന് അനുസരിച്ചുള്ള വസ്ത്രധാരണത്തിനും അനുമതി
പുതിയ സെല്ലിൽ കഴിയുന്നവർക്ക് അവരുടെ ലിംഗസ്വത്വത്തിന് അനുയോജ്യമായ വസ്ത്രങ്ങൾ ധരിക്കാനും ജയിൽ അധികൃതർ അനുമതി നൽകിയിട്ടുണ്ട്. ദേശീയ മനുഷ്യാവകാശ കമ്മീഷന്റെയും കേന്ദ്ര ആഭ്യന്തര മന്ത്രാലയത്തിന്റെയും നിർദേശങ്ങൾ നടപ്പാക്കുന്നതിന്റെ ഭാഗമായാണ് ഈ നടപടി.
ജയിൽ സൂപ്രണ്ട് സമർപ്പിച്ച റിപ്പോർട്ടിൽ പ്രത്യേക സെൽ സ്ഥാപിച്ചതായും വസ്ത്രധാരണവുമായി ബന്ധപ്പെട്ട ഇളവുകൾ അനുവദിച്ചതായും വ്യക്തമാക്കിയിട്ടുണ്ട്.
മനുഷ്യാവകാശ സംരക്ഷണത്തിന് ഊന്നൽ
തിരുത്തൽ കേന്ദ്രങ്ങളിൽ കഴിയുന്ന വ്യത്യസ്ത ലിംഗസ്വത്വമുള്ള വ്യക്തികളുടെ അന്തസ്സും മനുഷ്യാവകാശങ്ങളും സംരക്ഷിക്കുകയാണ് നടപടിയുടെ പ്രധാന ലക്ഷ്യമെന്ന് ദേശീയ മനുഷ്യാവകാശ കമ്മീഷൻ വ്യക്തമാക്കി.
തടവുകാരുടെ ലിംഗസ്വത്വം പരിഗണിച്ചുള്ള താമസസൗകര്യങ്ങളും അന്തസ്സോടെയുള്ള ജീവിതസാഹചര്യങ്ങളും ഉറപ്പാക്കുന്നതിൽ പുതിയ സംവിധാനം നിർണായക ചുവടുവയ്പ്പായാണ് വിലയിരുത്തപ്പെടുന്നത്