പട്യാല: പഞ്ചാബിലെ രാജ്പുരയ്ക്ക് സമീപം ഓടിക്കൊണ്ടിരുന്ന ട്രെയിനിന് തീപിടിച്ചു.
അമൃത്സറിൽ നിന്ന് കതിഹാറിലേക്ക് പോവുകയായിരുന്ന അമൃത്സർ കർമഭൂമി എക്സ്പ്രസിനാണ് തീപിടിച്ചത്.
ട്രെയിനിന്റെ നാല് കോച്ചുകളിലേക്കാണ് തീ പടർന്നത്. സംഭവത്തെ തുടർന്ന് യാത്രക്കാർക്കിടയിൽ വലിയ തോതിൽ പരിഭ്രാന്തി പരന്നു.
ട്രെയിനിൽ നിന്ന് കനത്ത പുകയും തീയും ഉയരുന്നതിനിടയിൽത്തന്നെ റെയിൽവേ ഉദ്യോഗസ്ഥരും പൊലീസും അഗ്നിശമന സേനയും ഉടൻതന്നെ സ്ഥലത്തെത്തി രക്ഷാപ്രവർത്തനം ആരംഭിച്ചു.
മണിക്കൂറുകൾ നീണ്ട പരിശ്രമത്തിനൊടുവിൽ തീ പൂർണ്ണമായും നിയന്ത്രണവിധേയമാക്കാൻ സാധിച്ചതായി അധികൃതർ വ്യക്തമാക്കി.
ട്രെയിനിലെ ഒരു കോച്ചിലെ ഫാനിലുണ്ടായ ഷോർട്ട് സർക്യൂട്ടാണ് അഗ്നിബാധയ്ക്ക് കാരണമെന്നാണ് റെയിൽവേയുടെ പ്രാഥമിക നിഗമനം.
തീ പടരുന്നത് ശ്രദ്ധയിൽപ്പെട്ടതിനെ തുടർന്ന് ട്രെയിൻ നിർത്തിയിടുകയും യാത്രക്കാരെ സുരക്ഷിതമായി ഒഴിപ്പിക്കുകയും ചെയ്തു.
അപകടത്തിൽ ആളപായമോ പരുക്കുകളോ റിപ്പോർട്ട് ചെയ്തിട്ടില്ലെന്നാണ് ഔദ്യോഗിക വിവരം.
സംഭവത്തെക്കുറിച്ചുള്ള കൂടുതൽ അന്വേഷണങ്ങൾ പുരോഗമിക്കുകയാണ്.