ജയ്പൂർ: പാകിസ്ഥാനുമായുള്ള രാജ്യാന്തര അതിർത്തിക്ക് സമീപം രാജസ്ഥാനിലെ ശ്രീഗംഗാനഗർ ജില്ലയിൽ റെയിൽവേ ട്രാക്കിലുണ്ടായ സ്ഫോടനത്തിൽ പൊലീസ്, റെയിൽവേ അധികൃതർ സംയുക്ത അന്വേഷണം ആരംഭിച്ചു. സംഭവത്തിന് പിന്നിൽ അട്ടിമറി ശ്രമമുണ്ടോയെന്നും ഭീകരബന്ധം ഉൾപ്പെടെയുള്ള സാധ്യതകളുമാണ് അന്വേഷണസംഘം പരിശോധിക്കുന്നത്.
അനുപ്ഗഢ്–സൂറത്ത്ഗഢ് റെയിൽവേ പാതയിൽ ചൊവ്വാഴ്ച രാത്രി 9.45ഓടെയാണ് സ്ഫോടനമുണ്ടായത്. പാകിസ്ഥാൻ അതിർത്തിയിൽനിന്ന് ഏകദേശം 40 കിലോമീറ്റർ അകലെയുള്ള 50 ജിബി ഗ്രാമത്തിന് സമീപമായിരുന്നു സംഭവം. സ്ഫോടനത്തിൽ റെയിൽവേ ട്രാക്കിന് താങ്ങായി സ്ഥാപിച്ചിരുന്ന രണ്ട് കോൺക്രീറ്റ് തൂണുകൾക്ക് കേടുപാടുകൾ സംഭവിച്ചു. ട്രാക്കിന് താഴെ കുഴിയും രൂപപ്പെട്ടു.
സ്ഫോടനത്തിന് ഏകദേശം 45 മിനിറ്റ് മുമ്പ് ഇതുവഴി യാത്രാ ട്രെയിൻ കടന്നുപോയിരുന്നു. അതിനാൽ ട്രെയിനിനെ ലക്ഷ്യമിട്ടുള്ള ആസൂത്രിത നീക്കമായിരുന്നോ സംഭവമെന്ന് അന്വേഷണസംഘം പരിശോധിക്കുന്നുണ്ട്.
എൻഐഎ അന്വേഷണം ഏറ്റെടുക്കുമോ?
രാജസ്ഥാൻ പൊലീസും റെയിൽവേ അധികൃതരും സംയുക്തമായാണ് അന്വേഷണം നടത്തുന്നത്. ഫോറൻസിക് സംഘം സ്ഥലത്തുനിന്ന് സാമ്പിളുകൾ ശേഖരിച്ചിട്ടുണ്ട്. സംഭവത്തിൽ ദേശീയ അന്വേഷണ ഏജൻസിയുടെ (എൻഐഎ) ഇടപെടൽ ആവശ്യമുണ്ടോയെന്ന കാര്യത്തിൽ പ്രാഥമിക അന്വേഷണത്തിലെ തെളിവുകൾ പരിശോധിച്ചശേഷം തീരുമാനമെടുക്കുമെന്ന് റെയിൽവേ മന്ത്രി അശ്വിനി വൈഷ്ണവ് വ്യക്തമാക്കി.
സംഭവസ്ഥലത്ത് ഭീകരവിരുദ്ധ സേനയും മറ്റ് സുരക്ഷാ ഏജൻസികളും പരിശോധന നടത്തി. ദൃക്സാക്ഷികളിൽനിന്നും റെയിൽവേ ജീവനക്കാരിൽനിന്നും വിവരങ്ങൾ ശേഖരിക്കുന്നുണ്ട്.
ട്രെയിൻ സർവീസുകൾ റദ്ദാക്കി
സുരക്ഷാ മുൻകരുതലിന്റെ ഭാഗമായി അനുപ്ഗഢ്–സൂറത്ത്ഗഢ് പാതയിലെ ട്രെയിൻ ഗതാഗതം താൽക്കാലികമായി നിർത്തിവെച്ചിരുന്നു. ബുധനാഴ്ച ഈ റൂട്ടിലെ നാല് പാസഞ്ചർ സർവീസുകളും റദ്ദാക്കി.
ഒക്ടോബറിൽ ശ്രീഗംഗാനഗർ അതിർത്തി മേഖലയിൽ സ്ഫോടകവസ്തുക്കളും ആയുധങ്ങളും പിടിച്ചെടുത്ത സംഭവവുമായി പുതിയ സ്ഫോടനത്തിന് ബന്ധമുണ്ടോയെന്നും അന്വേഷണ ഏജൻസികൾ പരിശോധിക്കുന്നുണ്ട്. എന്നാൽ ഈ സംഭവങ്ങൾ തമ്മിൽ ബന്ധമുണ്ടെന്നതിന് ഇതുവരെ ഔദ്യോഗിക സ്ഥിരീകരണമില്ല.
സ്ഫോടനത്തിന്റെ യഥാർഥ കാരണവും ഇതിന് പിന്നിലുള്ളവരെയും കണ്ടെത്താനുള്ള അന്വേഷണം തുടരുകയാണ്